Deputadu Paulo Moniz Maia hatete, profesór sira ne'ebé voluntáriu hanorin estudante sira hamutuk 4.200, maibé avaliasaun husi ministériu edukasaun hatudu ema balun ne’ebé durante ne’e la tama lista voluntáriu mak hetan kontratu no sira ne’ebé kontribui ona la hetan kontratu.

Ne’e duni, nia husu atu halo re-verifikasaun ba profesór kontratadu sira, tanba deskonfia bele mosu indísiu nepotizmu iha prosesu ne’e.

Nia mós sujere, atu pendente prosesu tomada pose ba funsionáriu kontratadu sira ne'ebé tuir ona teste ne’e.

“Ha'u husu ba Ministériu edukasaun atu hapara lai tomada de pose ne’e, depois ita rezolve tiha problema. Kuandu ministériu hakarak provas ruma, ha'u prontu atu hatudu”, tenik Paulo.

Deputadu Eládio Faculto mós hateten, rekrutamentu profesór sira ne’e importante tebes atu bele reforsa kualidade ensinu nian, maibé iha rekrutamentu ne’e tenke justu transparénsia atu prosesu tomak bele la’o di'ak.

Nia hatutan, profesór sira ne’e tenke fó duni prioridade atu bele hasa’e sira nia koñesimentu iha parte siénsia nian atu bele hasa’e kualidade edukasaun iha timor.

Tanba ne’e, husu atu ministériu edukasaun esforsu nafatin hodi hadi'a sistema edukasaun ne'ebé di'ak ba estudante sira.