“Ha’u kongratula koligasaun foun, ha’u espera katak sira bele hametin konsolida para depois kria pasu foun ka fó dalan ba pasu foun mai oin ita presiza iha orsamentu, ita presiza programa ita nian atividade sira la’o. Ita labele kontinua ho duodesimu nafatin,” dehan PM Taur, iha Palasiu Prezidensiál, Bairru-Pité, horisehik.

Antes ne’e, Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri hateten, laiha konfiansa atu koligasaun foun ne’ebé lidera husi Partidu CNRT sei dura.

Hataan ba jornalista sira kona-ba Partidu CNRT lidera ona koligasaun foun hodi forma governu, nia hataan “sei la moris”.

Nune’e, Konselleiru Másimu Partidu KHUNTO, José dos Santos ‘Naimori’ Bukar hateten, bloku koligasaun CNRT, PD, KHUNTO, PUDD, UDT, FM laiha negosiasaun, importante mak tenke iha sentidu governasaun hodi hakotu impase polítika rai laran.

“Koligasaun foun ne’e metin ka la metin ne’e ita fila ba ita-nia aan rasik, sai nu’udar lideransa ida iha esperansa atu forma governu tenke lori governu to’o rohan, la’ós ba kotuk hela de'it, oinsá povu nia moris ne’e di'ak,” dehan nia.

Tanba hamosu unidade nasionál mai husi ema hotu-hotu la'ós ema ki'ik ka boot tanba polítiku ne’e atu sai servidór.

Ne’e duni, Partidu KHUNTO iha esperansa iha badak Prezidente Repúblika sei Xanana Gusmão atu bele haree di'ak liután ba oin oinsá bele hakotu impase polítika ne’e.