Prezidente Repúblika, Taur Matan Ruak dehan, ema boot sira halo hela polítika atu implementa hanorin lian materna iha eskola, maibé sira nia-oan rasik la eskola iha Timor, maibé iha rai li'ur.

“Programa ida ne’e (lian materna) uluk maun Xanana nia kaben maka halo, maibé halo tiha maun Xanana nia oan ba eskola fali iha Austrália,” dehan nia, bainhira halo diálogu ho komunidade sira, iha Suku Maliubu, Postu Bobonaru, horisehik.

Xefe Estadu ne’e kontra hanorin labarik sira ho lian materna, tanba sira ne’e importante tenke hatene lian ofisial portugés, la'ós ba inventa fali hodi hanorin labarik sira ho lian materna.

Tuir nia, lian portugés ho inglés nu’udar katana ne'ebé kro’at ba futuru atu ko'alia hodi dezenvolve nasaun ne’e, la'ós uza lian materna.

“Ha’u nia oan sira la obrigatoriu atu hatene lian makasae, ha’u haruka ba eskola iha portugeza, tanba ne’e ha’u hakarak profesór sira ne’e hanorin estudante sira ne’e ho lian portugés,” dehan PR Taur.

Xefe Estadu akresenta, labarik estudante sira ne’e maka futuru nasaun nian, tanba ne’e profesór sira tenke hanorin lian ofisial no lian internasionál la'ós lian materna.

Iha diálogu ne’e, komunidade sira mós lamenta ho implementasaun lian materna. Komunidade Suku Maliubu, Salomão dos Santos hateten, sira ne’e preokupa kona ba estudante sira ne’ebé hanorin ho lian materna, maibé ema boot sira nia-oan ba eskola iha rai li'ur.