Sekretariu Jeral Partidu CNRT, Dionisio Babo hatete, deklarasaun Partidu nian atu apoiu kandidatu ida sei foti liu husi Kongresu ka forma seluk.
Maske konsidera deklarasaun Xanana nudar deklarasaun pesoal, maibé Dionisio dehan, desizaun partidu CNRT sei la sees husi buat ne’ebé Xanana hato’o ona.
“Ami tenke hein Kongresu para deside hamutuk, maibé sei tuir nafatin saida mak Senhor eis Primeiru Ministru (PM) atual Ministru Planeamentu no Investimentu Estratejiku ou Prezidente Partidu CNRT, Kay Rala Xanana Gusmão hatete,” dehan Sekjer CNRT ne’e ba jornalista sira iha Palasiu Governu, horseik.
Tuir planu, Dionisio dehan, CNRT sei hala’o Kongresu Nasonál iha fulan Abril tinan ne’e, mabé sei haree ba situasaun ne’ebé sei mai.
“Normalmente ami hein Kongresu, depois kuandu laiha, ami sei haree to’ok forma saida mak atu halo deklarasaun (hodi fó apoiu ba kandidatu PR).”
“Ita tenke haree liu estabilidade pais nian iha tinan lima (5) mai. Ita, CNRT, opta pizisaun ida katak, interese nasionál ne’e mak a’as liu buat hothotu, tanba ne’e mak atu foti desizaun, liliu kona-ba lideransa pais nian, oinsá mak ita atu implementa politika ba futuru ne’e, tenke tau interese nasionál ne’e iha leten liu,” deklara nia.
