Florentino da Silva mai husi Suku Fatubolu, Postu Administrativu Hatulia, Ermera, baixa ona iha Ospitál Nasionál Guido Valadares (HNGV) durante loron rua, Sesta no Sábadu (21-22/4), maibé doutór sira la hetan matebian ne’e nia moras.

Ne’e duni haruka alta husi ospitál, iha Sábadu (22/4). Nune’e, família sira lori fali mai iha aldeia Moris Foun, Suku Komoro, Postu Administrativu Don Aleixo, Dili.

Maibé, iha Domingu (23/4), madrugada, matebian deside hodi hakotu nia vida ho hena kortina janela nian iha ai-kaixote ida, besik ninia hela fatin iha Timor Lodge sorin.

“Ami lori katuas ba ospitál doutór sira hare moras laiha, entaun haruka ami lori nia mai uma,”esplika Guilhermino dos Santos da Silva, iha Komoro, horisehik.

Nia esplika, maski doutór sira la identifika ninia moras, kalan ida antes matebian tara-aan, vítima sei hateten ba nia oan mane katak, nia sente moras makaas iha parte kabun.

Família mós deside ona lakohi atu halo autópsia ba matebian, maibé lori ba iha foho hodi halo tuir prosesu funeráriu.

“Mate isin ami la entrega ba polisia sira atu halo autópsia iha HNGV, tanba ne’e ami sei lori ba Ermera para atu hakoi”, tenik nia.

Katuas ne’e mate ho hatais kamiza kór azúl no kalsa badak.