“Governu Timor-Leste fiar katak via do diálogu mak sei solusiona kestaun sira ne’e”, dehan nia, iha Komoro-Dili, horisehik.

Timoroan ne’ebé halo servisu iha Koreia Súl sira iha kontratu ida ho empreza ne’ebé lori sira ba ne’ebá. Tanba ne’e, governu ninia responsabilidade fó apoiu konsola.

Entretantu, Rui afirma, enkuantu buat hotu-hotu la’o di’ak kona-ba pás ho estabilidade iha ne’ebá, governu Timor-Leste buka akompaña.

Karik sidadaun sira ne’e ida-idak atu foti desizaun ruma fila mai Timor ka sees husi ne’ebá, ne’e desizaun ida-idak nian. Maibé, governu akompaña nafatin liu husi embaixada iha ne’ebá.

Antes ne’e, jornál ne’e publika ona katak, Governu Timor-Leste garante nafatin ba servisu na’in timoroan sira atu kontinua hala'o knaar hanesan baibain.

La’ós ne’e de’it, Governu mós monta ona adidu traballu ida iha Koreia Súl atu trata traballadór sira nia kondisaun iha situasaun difisil nia laran.

“Kuandu tentasaun makaas iha nasaun rua ne’e embaixada sira fó garantia ba Governu atu lalika ta'uk, timoroan sira servisu iha Koreia kontinua hala'o nafatin servisu”, dehan Diretór Jerál Polítika Formasaun Profisionál Empregu (SEPFOPE), Paulo Alves.

Tuir planu iha semana ne’e Xina no Amérika mak sei diskute oinsá atu haree kondisaun iha país Koreia nian hodi bele hasees konfronta armada ne’e.

Dadus ne'ebé diáriu ne’e hetan asesu, to’o 2014 traballadór timoroan iha Koreia Súl hamutuk 1.630, maibé númeru ne’e iha posibilidade aumenta makaas, tanba durante tinan rua nia laran 2015 no 2016, Governu kontinua haruka timoroan sira ba servisu iha nasaun ne’e.