Iha kampaña eleitorál daruak  loron (04/03), Kandidatu PR ho Numeru sorteiu 8  hetan apoiu husi lider Partidu Libertasaun Popular (PLP), KHUNTO, , UDT no PUDD inklui Reprezentante Veterano sira husi Munisipio Baucau simu ho serimonia tradisonal no tara tais.

PLP liu husi membru superior PLP Munsipiu Baucau  Nuno de Vasconselhos apoiu Kalohan ho apoiantes rihun 3000 resin ne’ebé nakonu iha salaun Tipo Grafia Baucau Vila.

 “Ha'u mai nudar membru superior PLP, lideransa nasional PLP iha diskusaun kona ba pozisaun PLP iha eleisaun prezidensial, strutura simu ordem husi Maun Taur Matan Ruak katak kandidatu kalohan maka  António da Conceição “KALOHAN” tamba nia iha kapasidade no reprezenta jerasaun foun”, Dehan membru Superior ne’e.

Iha nia diskursu  eis Komisariu  CNE ne’e fortifika liu tan katak Maun António da Conceição sei manan iha Baucau tamba loron-loron lideransa PLP halo kontaktu ho koordenasaun ho strutura posto to’o suku oinsa bele hetan vitoria.

Tanba ne’e, Nia apela ba militantes no simpatizantes ne’ebé hamutuk ona ho forsa politika ida hodi ba apoio  António da Conceição atu labele uza violensia no ameasa maibe presiza hatudu disiplina hato’o ia vizaun nudar jerasaun foun no respeita vontade Povu nian, husu atu unifika forsa no hanoin ida deit atu lori António da Conceição ba Palacio Aitarak laran.

“PLP nia opsaun la sala, PLP nia kandidatu uniku mak António da Conceição numeru 8 ne’ebé mai husi PD no fiar katak Baucau ita sei rompe” nia ajita.

Maibe , nia husu Importante liu tan atu hotu-hotu tenke servisu atu tau matan, matan moris no neon nain hodi asegura ba fraude eleitoral no tentativas ne’ebé mosu iha eleisaun prezidensial.

Nia hato’o mos apresiasaun ba PD ne’ebé nakonu ho jerasaun foun hatudu nia maturidade politika no brani foti desizaun ba Povu no Nasaun.

Iha  hanesan Kandidatu PR António da Conceição “KALOHAN” hato’o nia agradesimentu ba ema hotu-hotu, liu-liu ba Partido sira KHUNTO, PLP, PDN, PUDD, UDT no partido sira seluk ne’ebé apoia ba nia kandidatura ba Prezidente Repúblika.

Kalohan agradese no louva ba Baucau – oan sira ne’ebé hatudu sira nia maturidade.

 “Agradese tamba ohin situasuan hakmetek iha partisipasaun ne’ebé digno no siviku ne’ebé lahatudu eventu la hatauk ita, ne’e sasukat ida ne’ebé diak ba ita nia sivismu politiku nudar ema ne’ebé iha responsabilidade ba nasaun”,dehan Kalohan.

Kandidatura númeru ualu ne’e apela Ba nia apoiante sira no kompromete katak tempu to’o ona atu jerasaun foun ne’ebé uluk mos involve iha luta no to’o ohin loron hanoin ona oinsa mak bele asume responsabilidade hodi kontribui, hadia no muda nasaun nia distinu .

“Nasaun nee responsabilidae ita hotu nian, ita aprezenta an atu labele ragu-ragu tan no kompremete an atu liberta ita nia Povu.Tanba ne’e nia husu maun sira no lider nasaun nian atu labele duvida ho jerasaun foun”,tenik nia.

Kampaña ne’ebé halao durante oras rua nia nia laran, Kandidatu PR ho numeru sorteio 8 ne’e alerta nia kompromisiu no vizaun politika ba Povu Maubere tomak husi Jaco to’o Oecusse katak bainhira nia sai Prezidente Repúblika nia sei la halo buat ne’ebé Governo halo tamba hare ba separasaun de Poderes ne’ebé hatur ona iha Konstituisaun da Repúblika, nia mos labele fahe envelope fiskal tanba ne’e laos knar PR nian,

“Maibe buat ne’ebé hau bele halo maka hau bele halo advokasia buka hakbesik ukun ba Povu, sai defensor ba Povu, hau bele koalia ho Governu, bele halo no promove dialogo entre Instituisaun Estado nian hanesan Parlamento Nasional, Prezidente Repúblika, Ezekutivu (Governo) no Tribunal sira oinsa bele tur hamutuk ho halo Dezemvolvimentu ba ita nia Povu no buka atu defende buat ne’ebé los no fo benefisiu ba Povu maibe laos ba Grupo balun deit”, nia promote.

 Nia kompromete katak sei kontinua kaer metin prinsipiu ukun rasik-an, promove unidade nasional hodi buka halibur partidos politikus hotu-hotu nebe’e eziste iha Timor atu hametin estabelidade politika no seguransa iha RDTL, simu no respeita partidos politiku sira nia opiniaun hodi halo reprezentasaun politika no balansu ne’ebé forte ba ukun nasaun nian no kontinua hametin relasaun internasional oinsa mak atu liga povu Timor Leste ba povu iha rai sira seluk, kontinua nafatin halo kooperasaun ho Nasaun zivinu sira hanesan Australia no Indonézia oinsa maka bele hametin amizade entre povu ho povu.

Lideransa husi partido sira eziste iha Timor-Leste ne’ebé partisipa iha kampanha aberta ne’e mak hanesan Prezidente Partido Democratico  Mariano “Assanami” Sabino, Sekretario Konselho Politiku Nasional Lito Rambo ho diresaun nasional, Primeiro Vice Prezidente Partido KHUNTO  António Verdial, Sekretariu Jeral Partido KHUNTO no Diresaun Nasional Partido KHUNTO nian. Inklui strutura partido sira PD, KHUNTO, PLP, PUDD, UDT.