Xefi Govenu husu ba apoiantes hotu-hotu hosi kandidatu sira ne’ebé oras ne’e daudauk halo kampaña atu partisipa iha atividades kampaña eleitoral ne’e ho kalma ho dignidade hatudu maturidade ho dignidade hanesan povu Timor-Leste Lolos.

“Ita tenki dignifika importánsia prosesu demokrátika ne’ebé ita hala’o. Ita nia luta, maka luta atu liberta povu, tenki liu hosi prosesu ida ne’ebé dignu,”dehan PM Rui.

 “Ba poplusaun tomak atu liu hosi kampaña ida ne’e ho dignidade,  lapresiza uza violénsia tuda malu provoka disturbiu atu konvense ema seluk atu vota tuir ita ka vota la tuir ita”.

PM Rui dehan,  Dadaun ne’e hanesan momentu importante ida TL  hakat ba kampaña eleitoral atu hili nia Prezidente Repúblika no husu liu-liu ba joven sira atu komporta halo didi’ak durante kampaña.

“ Ita atu hakat ba festa demokrátika ho haksolok, la’ós sadik malu ka tuda malu”, apela Xefe Governu  iha aire-portu –Dili , foin lalais ne’e.

Nia dehan, Povu Timor-Leste ne’ebé ema hotu-hotu respeita iha mundu internasionál bainhira ba halo vizitas iha nasoens sira ne’ebé belun no apoiu TL admirasaun boot ba Timor-Leste tanba Timor-Leste hatudu iha tinan 1999 mai to’o agora ninia maturidade adopta valores demokrátikus, adopta diferensas  opiniaun ho dignidade tomak.

Iha Segunda (06/03), horisehik , Ministru Interior, Longuinhos Monteiro ho Komisáriu PNTL, Júlio Hornai hasoru Primeiru-Ministru  Rui Maria de Araújo, hodi halo avaliasaun kona-ba lalaok kampaña Prezidensial nian ne’ebé hahú tiha ona iha loron  3 fulan- Marsu.

Xefe Govenru ho Ministru Interior no Komisariu PNTL diskute regras atu mentein ordem públika durante periodu kampaña Prezidensial ne’ebé sei remata iha dia 17 Marsu.