Ne’e duni, bainhira iha eleisaun oin mai maka PLP hetan votu maioria Taur Matan Ruak mak sei kaer ukun iha Governu.
“Ha'u nia partidu maka PLP, entaun kuandu ha'u manan ha'u maka ukun governu. Hori-bainhira ha'u dehan ha'u sei ra'ut malu ho CNRT no FRETILIN,” dehan Taur iha diálogu komunitaria, iha Suku Bahu, Postu Baukau, Sesta (4/3).
Nia dehan, loloos lakohi fó sai ba públiku, maibé subar demais mós la di'ak. Tan ne’e fó sai tiha de'it ba públiku katak, ida ne’e maka sei halo bainhira mandatu remata hanesan Prezidente Repúblika iha 20 Maiu 2017.
PR Taur hatete, razaun la re-kandidata ba Prezidente Repúblika maka, di'ak liu sai rasik duke ema duni sai. Nia fó ezemplu, iha uma ida ho kaben no oan sira sempre hadau malu sofá tanba ida-idak toman ona tuur iha fatin ne'ebé di'ak, tanba ne’e hakarak mandatu ida de'it durante tinan lima.
Entretantu, vizita PR Taur iha Suku Bahu akompaña husi Prezidente Autoridade Munisípiu Baukau, Administradór Postu inklui mós lideransa komunitaria.
Povu Suku Bahu simu Xefe Estadu ho tebe-dai no bidu, maibé la to’o minutu udan boot tun, tan ne’e konsege hapara diálogu durante minutu balun no hein to’o udan para maka foin kontinua diálogu.
