Jenerál Lere dehan, oras ne’e daudaun ema sira ne'ebé uluk la fó laran ba nasaun ne’e agora kaer ukun iha partidu, tribunál, no balun sai ukun na’in ba nasaun ne’e.

Nia dehan, sei ulun boot sira maka la hatene jere, futuru oin mai ema autonomista sira neineik sei ukun povu ho nasaun ne’e.

“Uluk autonomista sira hakarak fila mai Timor-Leste bainhira ita nia governu maka aseita, entaun partidu polítiku balun fó pozisaun ba UNTAS sira atu envolve iha partidu laran,” dehan Lere, iha semináriu Pás no Toleránsia hodi Konsolida Independénsia Nasionál, iha Sentru Konvensaun Dili (SKD), horisehik.

Nia dehan, bainhira ukun na’in balun maka fó apoiu ba autonomista sira, konsidera autór balun ne'ebé uluk la fó laran ba nasaun ne’e bele lidera nasaun ne’e.

Komandante fitun rua ne’e hatutan, di'ak liu ema autonomista no lidera UNTAS sira ne’e labele sama rai Timor-Leste, tanba sira uluk nega ona rai ne’e.

Eis Gerrilleiru afirma, bainhira governu altura ne'ebá aseita ema pro-autonomista sira hakarak fila mai Timor hodi envolve partidu, lider Besi Merah Putih, Eurico Guterres bele kaer pasta Ministru Defeza no estadu ne’e bele monu.

Tanba ne’e, ezije ba estadu ho governu tenke hakribit ema pro autonomista sira labele sama-ain iha País ne’e.

Lere afirma, haree ba prinsípiu ema ne'ebé altura ne'ebá la fó laran ba nasaun ne’e, di'ak liu labele hakat mai rai ida ne’e hodi envolve partidu atu ukun nasaun ne’e.