Iha media sosial, facebook, mosu video balun ne’ebé hatudu, ema balun halo juramentu hodi tama ba partidu KHUNTO. Juramentu tama partidu ne’e la’os de’it halo husi sidadaun baibain, no deskonfia halo mós husi funsionariu estadu balun ne’ebé hakarak “buka pozisaun”, maibé halo mós husi pesoal Polisia Nasionál Timor-Leste (PNTL).
Kona-ba deskonfiansa ba pesoal PNTL, Komandante Jerál Daruak PNTL, Komisariu Mateus Fernades hatete, bainhira membru PNTL halo juramentu ba partidu signifika nia kontra lei disiplinar PNTL nian.
“Ha’u fiar katak ami-nia membru hotu-hotu hakruk ba Polisia Nasionál Timor-Leste, no mós hakruk ba konstituisaun, karik iha evidensia katak entre ami ruma ba jura ba Partidu KHUNTO, hafoin investigasaun mak ita sei haree,” dehan Komisariu Mateus iha Sentru Formasaun Polisia, Komoro, Kuarta (08/07).
Iha fatin ketak, kona-ba membru F-FDTL, Maijór Jenerál Lere Anan Timur garante katak laiha membru F-FDTL ida mak halo juramentu ba partidu KHUNTO.
“Agora ne’e informasaun barak, maibé dala-ruma ha’u husu sira dehan laiha, informasaun ne’e bosok, ha’u husu sira KHUNTO ‘imi halo ida ne’e ka la’e’, laiha, sira la halo buat ida, ema laran moras ne’e mak ko’alia hanesan ne’e ba sira,” dehan Lere.
Maske seidauk identifika membru F-FDTL ne’ebé jura ba partidu KHUNTO, maibé Lere dehan, nia la preokupa nia membru sira ba jura iha ne’ebé de’it, importante mak tenke leal ba irarkia.
“Ha’u dehan ba ha’u-nia membru ‘o juaramentu ba ne’ebé? diábu ka Maromak, naran leal ba ha’u, ne’e ha’u la tau problema ida, lealidade ne’e importante liu, bainhira nia leal ba ha’u ne’e signfika nia bosok buat seluk, maibé nia leal ba ida seluk signfika bosok ba ha’u, ne’e mak la di’ak,” dehan Lere.
Lere fó ezemplu ba membru F-FDTL ida ne’ebé nia hasai tanba la hatudu ninia lealdade ba irarkia maibé leal liu ba ninia grupu artemarsiais.
“Forsa armadas envolve ne’e imi hatene ona, uluk Lere duni sai ninia Sarjentu Abrio tanba nia Kera Sakti ninian, nia la leal ba Lere, haruka ba uma, nia bele halo juramentu maibé nia leal ba Lere ne’e Lere hadomi nia nafatin,” dehan Maijor Jeneral ne’e.
