Lere hatete, problema entre nia ho Angela hotu ona bainhira Angela deside hodi la halo manifestasaun kontra Prezidente Repúblika Francisco Guterres Lú Olo ne’ebé mós nu’udar Komandante Supremu Forsa Armada.

“Ha’u dehan ho Angela ne’e problema hotu ona, tanba ha’u-nia Komandante Supremu Forsa Armadas ka Panglima Tertinggi ne’e hakmatek ona, ha’u mós hakmatek ona, Angela husik ko’alia tesik ba, apezar depois feto ida tan, ne’e mak ha’u lakohi responde ona,” dehan Lere ba jornalista sira hafoin enkontru semanál ho PR Lú Olo iha Palasiu Prezidensiál Bairu-Pite, Kuarta (09/09).

Lere hatete, iha jornalista barak mak husu atu halo intervista ho nia kona-ba Angela, maibé nia lakohi ona, tanba dezde 2006 to’o ohin loron nia sempre koalia kona-ba Angela.

“Imi (jornalista) barak dehan atu ba intrevista, ha’u lakohi intrevista, ita ko’alia saida? ko’alia kona-ba Angela?, ha’u lakohi ona, ha’u lakohi ko’alia ona Angela, tanba Angela ne’e ha’u ko’alia nia naran husi 2006 to’o agora, ne’e tanba buat ruma.”

“Agora ami na’in rua buat ida laiha ona ne’e, atu ko’alia tan saida? agora nia dehan lori ha’u ba Tribunál, lori ba, ne’e Angela sei selu advogadu, ha’u la selu advogadu ida, ha’u ba mesak, ne’e mak imi lalika husu ona saida,” hatete nia.

Maske nune’e, Lere fó nafatin atensaun katak bainhira Angela book fali orgaun soberanu ida ka veteranu husi ailaran balun, Lere sei atua nafatin.

“Hanesan ohin ha’u dehan, apezar feto ida tan ne’ebé imi lalika ko’alia ona Angela, maibé nia bainhira book fali ha’u-nia orgaun soberanu ida ka ha’u-nia katuas veteranu sira mai husi ailaran ne’e ha’u atua nafatin, maibé agora laiha ona, tanba saida ita ulun moras fali no lakon tempu ho Angela ne’e,” katak nia.