Komandante operasionál PNTL, Superintendente Henrique da Costa hateten, relatóriu provizória ne’ebé PNTL simu husi Munisípiu Baukau rezulta ema rua mate no na'in tolu kanek no sobu uma no ai-horis lubuk ida iha territóriu Timor tomak.
Nia dehan, dezastre naturais ne’e akontese iha munisípiu hotu-hotu, maibé iha munisípiu seluk la rezulta vítima ruma lakon vida.
“Iha Munisípiu Baukau maka hamate ema rua no na’in tolu kanek, maibé munisípiu seluk so estagus de'it ai-horis no komunidade nia uma no sasán balun ne’ebé uza,” dehan Henrique, iha Hotel Ramelau, horisehik.
Oras ne’e daudaun, ekipa PNTL Munisípiu Baukau hamutuk ho MSS munisipál halo hela verifikasaun dadus ba vítima sira ne’ebé afeta husi anin no udan.
Henrique dehan, akontesimentu loron hirak liubá iha Munisípiu Vikeke, Manatutu, Ainaru, Kovalima komunidade sira nia uma no ai-horis hetan estragu, maibé la rezulta ema ida sai vítima ba dezastre ne’e.
Jornalista diáriu ne’e tenta konfirma ho Komandu Operasaun PNTL Munisípiu Vikeke kona-ba dezastre iha munisípiu ne'ebá, maibé parte sira seidauk halo verifikasaun dadus.
Tuir planu, verifikasaun dadus ne’e rasik sei hala’o iha Kinta (9/2) bainhira dadus ne’e rekolla hotu maka publika iha média.
Uma 14 iha Likisá Estragu
Entretantu, iha Munisípiu Likisá uma kain hamutuk 14 maka hetan estragu totál.
Vítima uma kain 14 ne’e hetan ona apoiu apoiu emerjénsia husi Cruz Vermelha Timor-Leste (CVTL) hanesan lona, biti, hahán no seluk tan.
Koordenadór Cruz Vermella Timor Leste (CVTL), Munisípiu Likisá, César da Silva Bruno hateten, apoiu ne’ebé CVTL fó nu’udar devér husi organizasaun nian hodi fó ajuda umanitária tuir kbiit ne’ebé iha.
Iha fatin hanesan, família vítima Francisco Vão de Fátima husu ba estadu tenke iha atendimentu ba komunidade sira, liuliu ba MSS Munisípiu Likisá halo koordenasaun ho CVTL hodi bele servisu hamutuk atu apoiu komunidade sira ne'ebé afeta ba dezastre naturais.
“Husu ba Estadu bele haree ajuda netik ba ami família ne’ebé uma sira hetan estragu hotu no liu ba MSS iha munisípiu ida ne’e,” tenik nia.
Entretantu, CVTL Munisípiu Likisá konsidera MSS Likisá la funsiona sira nia servisu ho di'ak.
“Ami halo ona liña koordenasaun ho MSS atu apoiu netik komunidade sira ne’ebé uma anin sobu, maibé sira laiha komentáriu atu atende ba komunidade sira ne’ebé hetan hela susar ba dezastre ne’e,” dehan Koordenadór Cruz Vermella Timor Leste (CVTL), Munisípiu Likisá, César da Silva Bruno.
Nia hatutan, CVTL rasik responde ona vítima sira ninia sofrimentu, maibé tuir kbiit ne’ebé iha.
Bainhira diáriu ne’e atu konfirma ba Diretór MSS Munisípiu Likisá, maibé nia labele fó komentáriu tanba laiha tempu.
