Iha loron Sábadu (04/02), inan isin rua ida husi Suku Bauro (lakohi temi naran) hetan baku husi Parteira balun bainhira nia kanotak moras atu tuur ahi.

iróniku liu, Parteira ne’e atende inan isin rua ne’e to’o labarik moris husi kabun ho kondisaun mate.

Maibé, Parteira ne’e dehan labarik ne’e mate tanba nian ain mak sai uluk husi kabun laran.

Tuir kronolojia ne’ebé konta husi inan isin rua ba INDEPENDENTE katak, nia kanotak moras iha Sesta (03/02),Oras tuku 3:00 dadeer, to’o Sentru Saúde Lospalos atende husi parteira ne’ebé laiha étika profisionál.

“Parteira ne’e baku makas ha'u nia kelen ne’ebé ha'u hakfodak hodi laiha forsa atu hahoris ha'u nia bebé ne’e to’o mate, bebé ne’e moris ho kilograma 3,5,” dehan nia ho tanis ba Diáriu INDEPENDENTE, horisehik.

Iha fatin hanesan, la'en husi inan isin rua Abílio de Jesus dehan, kuandu bebé mate ne’e destinu husi maromak Maibé família la konkorda mak parteira halo atendimentu ‘kasar’ ba inan isin rua.

“Ami la'ós dehan nia mak halo ami nia oan mate maibé ami la simu nia atendimentu la ho étika profisionál tanba kasar no baku ha'u nia feen nia kelen mora to’o agora,”Dehan nia.

Tanba ne’e, Xefe Família ne’e husu ba lideransa Sentru Saúde Lospalos no Ministériu Saúde atu muda parteira ne'e ba fatin seluk no fó formasaun ba parteira sira iha Munisípiu Laútem.

Tuir Informasaun ne’ebé diáriu ne’e asesu katak inan isin rua barak sai vítima hahalok brutalidade no laiha profisionalizmu husi parteira ne'e.

Diáriu ne’e kontakta ba Xefe Sentru Saúde Komunitaria Lospalos no Delegadu Ministériu Saúde Lospalos, maibé la atende.