Traballadór Otél Com Beach La Simu Saláriu Fulan Neen Featured

By Fevereiru 09, 2017 1093
Otel Com Beach Otel Com Beach

DILI: Traballadór na’in 10 ne’ebé servisu iha Hotel Com Beach, fulan neen ona seidauk simu saláriu tanba jerente ka na'in ba otél ne’e deskonfia halai ona ba nia rain Austrália.

Traballadora Nina Fernandes Xavier hateten, hahú husi fulan-Maiu 2016 mai to’o Fevereiru ne’e traballadór sira ne’ebé servisu iha otél ne’e seidauk hetan nia direitu.

Nia esplika, to’o ohin loron sira sei kontinua hala’o nafatin servisu bazeia ba kontratu ne’ebé asina ho empregadu.

Nia hatutan, jerente ka na'in ba otél Vain Tomas foti ain husi fatin ne’e laiha liafuan ruma no to’o agora laiha komunikasaun ruma ne’ebé ko'alia kona-ba ezisténsia otél ne’e ba futuru.

“Ami na'in sanulu ne’ebé servisu iha otél ne’e durante Tinan 10 ona. Tanba ne’e, ami husu atu selu PHK mai ami ne’ebé servisu iha ne’e,” dehan Nina via telefone, horisehik.

Nia hatutan, maski ohin loron na’in ba otél ne’e la hela ona iha Timor, maibé husu ba governu atu buka meius oinsá hodi kontaktu ba patraun ne’e atu bele fó sira nia direitu.

Se la’e alternativa seluk mak, governu liu husi Ministériu Turizmu Arte Kultura (MTAK) koordena ho jerente Vain Tomas atu buka fali ema seluk hodi investe hikas fila-fali atu bele loke servisu ba sira.

Entretantu iha fatin seluk, Deputada Albina Marçal hateten, Hotel Com Beach ne’e koñesidu iha Munisípiu Lautem, tanba durante ne’e turista sira ne’ebé mai husi estranjeiru no nasionál sira ne’ebé ba vizita Munisípiu Lautem barak hili fatin ne’e hodi ba deskansa.

Tuir deputada ne’e hateten, problema ne’ebé ohin loron traballadór sira enfrenta ne’e governu tenke buka meius oinsá atu solusiona preokupasaun traballadór sira nian.

Nia hatutan, antes ne’e harii otél iha fatin ne’e parese jestor ne’e iha relasaun ho governante balun no dala ruma estabelese kontratu ruma entre governu ho otél na’in ne’e, entaun bele buka dalan legál ruma hodi foti desizaun para bele funsiona hikas otél ne’e.

“Karik governu buka dalan maibé laiha atu hetan jerente ne’e Ministériu Turizmu tenke foti medida hodi investe fali atu otél ne’e bele funsiona para ema ba karik bele uza,” dehan Albina.

Nia hatutan, presiza tebes atu funsiona fali otél ne’e, tanba parte ida bele fó reseita ba povu ki’ik sira ne’ebé hela besik iha ne’ebá no bele fá mós kampu traballu ba ema sira iha ne’ebá.

Nia hatutan, área Com ne’e hanesan fatin ne’ebé potensialidade tebes ba aérea turístiku tanba iha paizajen ne’ebé furak atraiante tebes hodi bele dada ema ba pasa férias iha fatin ne’e.

Haree ba polítika governu ne’ebé halo ona divizaun territoriál governu tenke investe daudaun ona iha área hanesan ne’e atu nune’e bele fó reseita ba governu lokál para bele uza hodi dezenvolve fali setór sira seluk ne’ebé konsidera importante iha futuru.  

 

 

Rate this item
(0 votes)

Independente Digital TV