Amu Bispu Dioseze Dili Don Virgílio do Carmo da Silva husu ba povu Timor-Leste tomak ne’ebé atu hili Prezidente Repúblika (PR) ba períodu 2017-2022 tenke haree ba ema ne'ebé iha kapasidade.

Festa demokrasia ne’e hala’o ona iha tinan hirak liu ba kotuk to’o tinan sanulu resin-lima Timor-Leste hetan ukun-aan ona.

“Figura ne’ebé tenke iha kapasidade bele kria fatin ida iha Timor ba ema barak bele buka moris,” tenik nia, bainhira partisipa semináriu Pás no Toleránsia hodi Konsolida Independénsia Nasionál, iha Sentru Konvensaun Dili (SKD), horisehik.

Amu Bispu dehan, bainhira timoroan sira bele hetan ona servisu sira bele hakmatek, ne’e bele garante ona pás no estabilidade ba iha Timor.

Tuir nia, la’o ba oin mak ho númeru timoroan barak la hetan servisu ne’e sei sai dezafiu boot ba timor.

Amu Virgílio dehan, agora daudaun oportunidade ba timor oan ida-idak tenke tau kritériu ruma, hodi hanoin ba futuru Timor oinsá mak hakarak atu hetan, kuandu iha vizaun klaru bele koloka kandidatu sira ne’e.

Iha fatin hanesan, Primeira Dama, Isabel Ferreira hatete, feto kandidata ba prezidensiál ne’e responsabilidade ne'ebé todan no la’ós atu rame-rame hakarak kandidata-aan, maibé tenke sukat kapasidade atu garante pás no estabilidade nasaun nian.

“Ha’u la haree feto ho mane, maibé hakarak timoroan ne'ebé mellor sai ezemplár ba ita nia nasaun no lider másimu ita nia rai ne’e,” tenik nia.

Ne’e duni, kampaña sensibilizasaun tuir mai mós importante atu hasae konxiénsia ba sidadaun hotu, liu-liu ba ema ne'ebé hakarak kaer kargu politiku tenke preparaaan no iha koñesimentu jera atu sai prezidente ne'ebé di'ak no deputadu ne'ebé di'ak atu iha duni objetivu ne'ebé ema hotu hakarak.