Akuzasaun Ministru Planeamentu Investimentu no Estratéjiku (MPIE), Kay Rala Xanana Gusmão ba Prokuradór José Ximenes katak, utiliza osan estadu nian hodi sosa sasán privadu, ne’ebé iha indisius ba Pekulatu ho uzu.

Nune’e, Juis Guilhermino akuza katak fó projetu konstrusaun tribunál ba ninia família sira ne’ebé tuir lei iha indisius ba Korrupsaun pasiva ba aktu ilísitu no krime Korrupsaun pasiva ba aktu lísitu.

Tanba ne’e, tuir Kódigu Prosesu Penál (KPP) artigu 229.º kona-ba “Inkéritu hasoru majistradu” hateten, pontu (1) Kuandu majistradu ruma maka notísia-du-krime nia objetu, tenke nomeia atu halo inkéritu majistradu ida ho kategoria ka antiguidade hanesan ka aas-liu arguidu nian.

Nune’e iha pontu (2) Kuandu Prokuradór-Jerál ba Repúblika maka notísia-du-krime nia objetu, tenke nomeia atu halo inkéritu, tuir sorteiu, juíz ida iha Supremu Tribunál ba Justisa; juíz ne’e la bele partisipa iha julgamentu.

Akuzasaun ne’e bele fó implikasaun negativu hodi hafraku judisiáriu justisa Timor-Leste nian. Ne’e duni, importante tebes atu kria ekipa investigasaun ba ema na’in rua ne’e.

“Alegasaun mai husi karta aberta ne’e sériu ba ita nia sistema judisiáriu. Tuir ami importante atu harii konfiansa públiku, konfiansa sosiedade Timor nian ba funsionamentu ba sistema judisiáriu no kredibilidade sistema judisiáriu sira nian,” dehan Diretór JSMP Luis de Oliveira Sampaio, iha ninia servisu fatin, Vila-Verde, horisehik.

Nia husu ba Ministériu Públiku no Tribunál Rekursu atu harii ekipa ida atu investiga kona-ba alegasaun ne’e, atu nune’e bele klarifika. Tanba investigasaun kuandu iha forma rua ba kriminalidade no administrasaun ka indixiplinadu.

“Presiza investiga… se lae ita komunidade sira bele dehan katak afinál ita nia sistema judisiáriu nakonu ho mafiozu no korrupsaun. La di'ak ba ita no parseiru dezenvolvimentu sira,” tenik Luis Sampaio.

Tuir nia mekanizmu ba investigasaun maka instituisaun rua ne’e iha konsellu majistratura ne'ebé bele haruka ba iha ne’ebá atu bele investiga.

Antes ne'e, Jornál INDEPENDENTE halo ona tentativa hodi konfirma alegasaun Ministru Xanana nian, maibé Prokuradór Jerál Repúblika, José Ximenes la fó resposta.

Jornalista diáriu ne’e halo tentasaun dala rua hodi entrevista Prokuradór Jerál Repúblika, José Ximenes maibé lakohi fó komentáriu.