Tuir kronolojia, insidente ne’e akontese entre joven ho joven maka provoka malu hodi hamosu problema iha festa kazamentu ida iha parte Metiaut.

Joven sira ne’e balun koñese nia nu’udar membru polisia entaun husu ajuda ba nia atu sori tanba iha momentu ne’e polisia sira seidauk halo intervensaun.

Momentu ne’e situasaun la kontroladu ona, otél, sede suku no kioske ki’ik sira iha área ne’e rahun tanba hetan tuda. Entaun ho kbiit membru polisia ne’e hamriik iha klaran hodi hakalma situasaun.

Maibé derrepente ema asaltu, baku no sama iha rai. Hafoin ne’e vítima ne’e dolar ba valeta kuak no foti sai pistola tiru ba leten mak foin joven sira ne’e sees-aan.

Liu tiha minutu balun mak foin polisia eskuadra Bekora nian too iha fatin akontesimentu no lori halai vítima ba Hospital Nasionál Guido Valadares (HNGV).

Vítima ne’e dehan, ema ne'ebé asalta ne’e nia la koñese tanba husi fatin seluk mak mai halo problema iha bairru laran no ema kuaze 50-resin maka asaltu lesuk.

Kazu ne’e nia hato’o ona atu halo prosesu investigasaun hodi buka tuir joven sira ne’ebé halo problema iha momentu ne’ebá.

Tuir observasaun diáriu ne’e, vítima to’o agora nia matan sorin parte karuk sei bubu no seidauk bele loke. Nune’e, liman karuk sei bubu tanba ema baku no kotuk laran maka vítima sente moras hela.