Kazu ida ne’e mak akontese ba Afonso Alves. Nia tenke ba hatan iha Tribunal Distrital Dili tanba fa’an manu loriku.

Ministériu Públiku akuza arguidu sai hanesan autór material ba krime espésie tuir artigu 218 númeru 1 no krime dezobedioensiaiha artigu 244 kodigu penal Timor-Leste.

Tuir lei, ema ne’ebé kontra espésie ka subespésie klarifikasaun hanesan perigu atu hotu hetan ameasa pena prizaun tinan 5 ka selu multa.

Liu husi audensia jultamentu iha TDD, MP akuza katak, iha 24 Agostu 2015 tuku 3:00 loraik, ekipa Guarda Floresta no PNTL liu husi ninia operasaun kaer arguidu ne’ebé fa’an manu loriku iha loza Sigma nia oin.

Iha akuzasaun ne’e MP deklara mós katak arguidu fa’an bebeik ona animal fuik hanesan manu kakatua, loriku, makikit no Lekirauk.

Hatan ba akuzasaun ne’e, arguidu deklara ba Tribunál katak faktus ne’e loos hotu no rekoñese nia fa’an duni manu fuik hahú husi tinan 2001 to’o 2015.

“Ha’u fa’an manu ne’e sosa husi ema seluk ho folin dollar $15. Ha’u fa’an tutan ne’e manu ida ho folin dollar $20. Ha’u fa’an manu ne’e tanba servisu laiha,” dehan arguidu iha TDD, Segunda (27/02).

Hafoin rona deklarasaun ne’e, liu husi alegasaun MP husu ba Tribunál atu fó pena ne’ebé justu tanba arguidu rekoinese katak nia fa’an manu hahú husi tinan 2001 to’o 2015, no arguidu foin para hafoin hetan kaer husi autoridade.

Entretantu, Defensór husu ba Tribunál atu fó pena ne’ebé mak adekuadu tanba arguidu arepende ona nia sala no promete sei la halo tan.

Audensia julgamentu ne’e prezide husi Juiz Singular Zulmira Auxiliadóra. Ministériu Públiku reprezenta husi Prokuradór Remezia de Fatima, no arguidu hetan asistensia legal husi Defensór Públiku.