Atu asegura seguransa durante periodu eleisaun ne’e, Polisia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) sei serbisu hamutuk hodi asegura seguransa.

“Karik iha ema ruma ne’ebé koko atu sobu estabilidade bainhira iha elisaun ida ne’e, ami sei foti medidas ida ne’ebé forte tebes no laiha negosiasaun ida,” deklara Komisariu Julio liu husi Konferensia Imprensa iha Kuartel Jeral PNTL Kaikoli-Dili, Segunda (27/2).

Nia dehan, eleisaun ba tinan ne’e diferente ho eleisaun sira iha tinan 2002, 2007 no 2012, tanba iha momentu ne’eba ONU sei fó apoiu, maibé daudauk ne’e responsabildade tomak iha PNTL ho F-FDTL nia liman.

Tan ne’e, nia dehan, F-FDTL ho PNTL tenke kumpri nia responsabilidade, maske nia misaun diferente.

Komisariu Julio dehan, maske segurasa ne’e kordenada maibé, espesialmente PNTL mak hamrik iha oin hodi asegura segurasa iha elisaun jeral no kampaña ba kandidata Prezidente Repúblika.

Bainhira iha pertrubasaun no PNTL la konsegue rezolve, PNTL sei husu ajuda ba Komando F-FDTL hodi fó apoiu kombate krime iha terenu.

Iha fatin hanesan, Xefe Estadu Maior Jeneral F-FDTL, Maijor Jeneral Lere Anan Timur afirma, iha elisaun 2017 ida ne’e povu Timor hamrik mesak hodi halo seguransa ba elisaun ne’e.

Nia dehan, F-FDTL ho PNTL nia misaun diferente maibé instituisaun rua ne’e halo kompleta ba malu tanba instituisaun rua ne’e nudar instrumentu nasaun nian.

“Ha’u dehan estadu uza bainhira presiza no estadu uza bainhira nesearia duni,” dehan Lere.

Nia dehan, istituisaun rua ne’e nia dever mak interven ho reprime, katak bainhira krime ruma akontese iha rai laran, nia funsaun mak kaer ema, tiru ema bainhira nesesaria no oho ema bainhira envolve direta kazu krime boot.