Ida ne’e mak la akontese iha familia Carlos Menezes no Albertina Miranda. Sira tenke dada-malu to’o Tribunal tanba Carlos komete krime violensia domestika hasoru nia fen, Albertina.

Carlos ne’ebé sai arguidu baku nia fen (lezada) Albertina tanba lezada hasai lia-fuan ne’ebé konsidera xoke ninia dignidade nudar xefe familia.

Tuir akuzasaun husi Ministériu Públiku ne’ebé lee sai iha audensia julgamentu iha Tribunal Distrital Dili (TDD) katak, iha 15 Novembru 2015 iha Pantai Kelapa, lezada haruka arguidu hein labarik atu lezada bele ba servisu, maibé arguidu nonok de’it.

“Nune’e lezada ko’alia tan dala ida, Ó hein labarik (ha’u) ba servisu hodi selu ema nia deve,” deklara MP.

Hafoin rona ne’e, arguidu tama uma laran, tuku lezada nia rentos dala rua, nune’e lezada halai ba kuartu laran foti arguidu nia roupa no dehan atu ba fa’an hodi selu deve, tanba roupa ne’e lezada mak sosa. Rona ida ne’e, arguidu tuku tan lezada nia rentos dala rua nune’e halo ran sai.

Arguidu deklara katak, akuzasaun ne’e balun loos no balun la loos.

Nia dehan, nia tuku lezada tanba lezada ba foti toga atu ba sunu. Toga ne’e arguidu nia inan-aman mak haruka osan mai hodi sosa.

“Ha’u duni nia tanba nia dehan atu sunu toga ne’ebé mak uluk ha’u hatais hodi wisuda nian ne’e,” dehan arguidu ba Tribunál.

Iha fatin hanesan, Lezada dehan toga ne’e la’os arguidu nia inan-aman mak sosa, maibé nia ho arguidu mak tau osan hamutuk hodi soa.

“Toga ne’e ha’u atu ba fa’an duni tanba ami-nia deve barak loos. Arguidu nervozu hodi tuku ha’u-nia rentos, maibé ha’u sees mak kona iha piku hodi ran sai, suku ba pontu rua,” dehan nia.

Hafoin akontesimentu ne’e, lezada deside ba hela ho nia familia sira durante fulan ida resin, no liu tiha fulan ida mak arguidu ba husu deskulpa ba lezada ho familia sira. 

Rona tiha deklarasaun husi  parte rua, Tribunál husu ba Ministériu Públiku atu halo alegasaun. Liu husi alegasaun, Ministériu Públiku husu ba tribunal atu aplika pena suspensaun ba arguidu.

Entretantu, Defensór Públiku husu ba Tribunál atu aplika pena ne’ebé adekuadu tanba arguidu mós arrepende ba nia sala no iha futuru sei la halo tan.

Tribunál adia julgamentu ba 10 Marsu 2017 tuku 9:00 dader hodi rona desizaun.

Audensia julgamentu ne’e prezide husi Juiz Singular Edite Palmira. Ministériu Públiku reprezenta husi Prokuradór Nelson Carvalho, no arguidu hetan asistensia legal husi Defenór Públiku João Tavares.