Konfrontasaun nee mosu iha kampañia loron dahuluk bainhira militante sira husi kandidatura la hanesan  provoka malu iha Rai Kotu iha Sesta (3/3).

Segundu Komandante  PNTL Munisípiu Dili, Superintendente Asistente Euclides Belo dehan, konfrontasaun ne’ebé militante sira husi kandidatura PR rua halo iha Rai Kotu, Polisia kaptura ona suspeitu nain ida ne’ebé deskonfia autór prinsipál iha konfrontasaun ne’e.

“Ita detein  hela suspeitu na’in ida ne’ebé  atu lori ba Tribunál hodi halo julgamentu. Tanba n’e ita hein desizaun Tribunál,” dehan Euclides ba Jornalista iha Komandu PNTL Munisípiu Dili, Segunda (6/3).

Oras ne’e dadaun Polisia identifika tan suspeitu na’in lima, tanba ne’e Komandu ezize ba Tribunál hodi halo mandatu de kapturasaun ba suspeitu na’in lima ne’ebé deskonfia autór hodi provoka situasaun ne’e.

Komandu PNTL Sei halibur hela informasaun atu buka tuir motivu ba kazu ne’e, karik sei iha tan suspeitu balun ne’ebé involve konfrontasaun ne’e.

“Ita promove tan hodi nune’e kaptura tan suspeitu ne’e, tanba ita deskonfia  sira maka autór prinsipál,” dehan Euclides.

Nia dehan, ema sira ne’e gosta halo azitasaun  propaganda atu hamosu konflitu  iha eleisaun jeral  ne’ebé besik ona. Tanba ne’e maka Komandu la tolera se de’it maka halo krime.