Bartolomeu ba hatan la’os tanba nia konkore iha vaga rua ne’e, maibé tanba nia aprezenta númeru Kartaun Eleitoral ne’ebé la hanesan iha ninia karta aplikasaun.

Tuir akuzasaun Ministériu Públiku ne’ebé Tribunál lee sai katak, iha Abril 2011, STAE loke konkursu ba vaga Ofisial Sistema Dadus. Hafoin simu aplikante sira nia aplikasaun, STAE hala’o selesaun no ikus mai halo intervista ba konkorente sira ne’ebé liu selesaun dokumentus.

Iha prosesu intervista ba kandidatu husi Munisipiu Ainaro no Dili ne’ebé realiza iha 3 to’o 9 Maiu 2011 ne’e, funsionariu STAE deteta arguidu Bartolomeu hatama dokumentus ba vaga rua (2), ida hatama iha edifisiu STAE Ainaro no ida seluk hatama iha STAE Dili.

Liu tan, funsionariu sira identifika arguidu hanesan portadór ba kartaun elietóral rua ne’ebé mak la hanesan, iha dokumentus ne’ebé hatama ba STAE Ainaro, arguidu uza kartaun eleitoral ho númeru 0235932 no iha Dili ho númeru 0612277.

Ho faktus hirak ne’e, MP akuza arguidu envole iha krime falsifikasaun agravada ne’ebé previstu iha artigu 304 kodigu penal Timor-Leste.

Hafoin rona akuzasaun, arguidu deklara ba Tribunál katak, faktus ne’e loos hotu.

“Ha’u halo dokumentu ne’e hahú iha 2007, ida iha Dili no mós Ainaro,” dehan arguidu ba Tribunál liu husi audensia julgamentu, Tersa (07/03).

Rona deklarasaun arguidu, Tribunál  husu MP atu halo alegasaun no MP deklara mantein nafatin akuzasaun, tanba arguidu mós deklara ba Tribunál katak faktus ne’e loos hotu.

Entretantu, Defeza husu ba Tribunál atu aplika pena multa tanba arguidu konfesa hotu nia sala no arepende ona.

Audensia julgamentu ne’e tribunál adia fali ba 22 Marsu 2017 tuku 2:00 loraik Otl hodi rona desizaun final.

Audensia julgamentu ne’e prezide husi Juiz Koletivu, Ministériu Públiku reprezenta husi Prokuradór Reinato Berenahak, no arguidu hetan asitensia legal husi advogadu privadu Adelina Melok Lugu.