Durante moris hamutuk, IF sempre deskonfia nia fen, ES kama-rua (selingkuh) ho mane seluk. Deskonfiansa ida ne’e sempre hamosu problema iha sira-nia uma-kain.
Ho hanoin atu rezolve problema ne’e, Ministériu Públiku (MP) liu husi ninia akuzasaun hatete, iha 1 Maiu 2016, tuku 5:00 loraik, IF lori ES ba nia tian nia uma iha Kuluhun-Bekora.
Hafoin rezolve problema ne’e, arguidu fila uluk ba uma no la to’o oras ida lezada mós fila ba uma. Bainhira to’o uma, arguidu ne’ebé toba hela iha sala hahú hasai lia-fuan at hasoru lezada.
“Maibé lezada hatan ba arguidu katak ‘Ó ko’alia to’o Ó baruk’. Rona ida ne’e, arguidu nervozu hodi tuku lezada nia rentos parte karuk dala rua (2), tuku tan iha kabas parte loos, no rasta lezada husi kama leten monu ba rai,” deklara MP iha ninia akuzasaun iha audensia julgamentu iha Tribunal Distrital Dili, Kuarta (08/03).
Tuir MP, konsekuensia husi arguidu nia hahalok ne’e halo lezada hetan moras no bubu iha isin lolon.
Nune’e, MP akuza arguidu sai hanesan autór material ba krime violensia domestika iha artigu 145 kodigu Penal Timor-Leste.
Hafoin rona akuzasaun ne’e, arguidu hili nonok de’it.
Iha fatin hanesan, lezada ES dehan, arguidu baku nia tanba nia fila ikus ba uma.
“Nia tuku ha’u-nia rentos dala rua no kabas dala ida no rasta ha’u husi kama monu ba rai,” dehan lezada.
Hafoin akontesimentu ne’e, lezada ba hato’o keisa iha Polisia, maibé liu tiha semana ida, arguidu husu deskulpa ba lezada no daudauk ne’e sira di’ak malu no moris hanesan fen ho laen.
Rona deklasaun ne’e Tribunál husu ba MP atu halo alegasaun. Liu husi alegasaun MP husu ba Tribunál atu aplika pena prizaun fulan 6 suspende ba tinan 1.
Entretantu, Defensór Públiku husu ba Tribunál atu fó pena ne’ebé mak kaman no justu ba arguidu, tanba arguidu hili nonok, nune’e mós iha deklaarasun lezada nian loos hotu.
Hafoin alegasaun ne’e, Tribunál adia julgamentu ba 17 Marsu 2017 tuku 2:30 loraik hodi rona desizaun final.
Audensia julgamentu ne’e prezidi husi Juiz Singular, Maria Modesta, MP reprezenta husi Prokuradóra Ivonia Guteres, no arguidu hetan asistensia legal husi Defensór Públiku, Sebastião Amandio.
