×

Atenção

JUser: :_load: Não foi possível carregar usuário com ID: 428

Kampaña Eleitorál 20 Juñu, Remata 19 Jullu Featured

By Juñu 12, 2017 1393
kampanha presidensial 2017 kampanha presidensial 2017

DILI: Data kampaña eleisaun lejizlativa sei hahú iha 20 Juñu to’o 19 Jullu. Durante fulan ida nia laran partidu polítiku sira sei ba halo kompromisu polítika ho povu eleitór sira iha baze atu bele vota ba sira.

Prezidente interinu Komisaun Nasionál Eleisaun (CNE), Duarte Tilman hatete, data kampaña eleitorál fiksa ona, hein partidu polítiku sira atu ezekuta iha loron no data ne'ebé determina ona.

Maski nune’e, antes tama ba ne’e, partidu polítiku ida-idak tenke aprezenta kalendáriu kampaña eleitorál ba CNE atu bele halo verifikasaun, nune’e kuandu kampaña la’o oráriu labele xoke malu iha terrenu.

“Evita mosu mosu konflitu partidu polítiku sira tenke aprezenta kalendáriu kampaña nian atu ita diskute hamutuk”, dehan nia, iha enkontru ho partidu polítiku, iha salaun CNE, Kaikoli, foin lalais ne’e.

Nia hatutan, aprezentasaun kalendáriu kampaña partidu polítiku nian ne’e importante tebes. Kuandu la haree didi'ak posibilidade sei akontese konfrontasaun entre massa ka militante sira hasoru malu bele kria problema.

Tanba ne’e, husu ba partidu polítiku sira atu bele koopera hamutuk ho CNE hodi haree ba prosesu sira ne’e atu eleisaun bele la’o di'ak ho pás no estabilidade.

Nia reforsa, partidu polítiku sira liu husi sekretariadu nasionál tenke ativu atu programa balun ne'ebé importante no presiza atu trata ho emerjénsia bele atende relasiona ho prosesu ne’e.

Entretantu, Presidente Partidu Dezenvolvimentu Nasionál (PDN) Fernando Dias Gusmão hatete, partidu PDN prontu ona atu aprezenta kalendáriu kampaña eleitorál ne'ebé determina ona.

Nia hatutan, kuandu partidu polítiku sira hatama hotu ona kalendáriu kampaña eleitorál, CNE tenke marka tempu ruma atu bele tuur hamutuk fali ho partidu polítiku sira bele haree hamutuk kalendáriu ne’e. 

Rate this item
(0 votes)
Last modified on Tersa, 13 Juñu 2017 16:59

Independente Digital TV