Presidente Partidu Frente Mudansa, José Luis Guterres hatete, Partidu Frente Mudansa durante ne’e hetan asentu iha Parlamentu Nasionál ho kadeira rua.

Atu asume kargu polítiku sira hanesan deputadu ne’e partidu mak atribui liu husi votu konfiansa militante nian. Tanba ne’e, kargu ne’e uza hodi defende polítika partidu nian, maibé kuandu sai ona husi partidu hodi afilia ba partidu seluk signifika nia labele defende ona polítika partidu nian iha PN, hakarak ka lakohi tenke sai.

Daudaun ne’e maski Jorge Teme deklara tama ona ba PLP, maibé iha Parlamentu Nasionál sei kontinua tuur nafatin iha Partidu nia oin. Tanba ne’e, partidu foti ona desizaun hakarak substitui, tuir regra ne'ebé iha hodi halo karta ba prezidente parlamentu nasionál atu bele haree ba kestaun ne’e.

“Ami hatama ona karta ba prezidente parlamentu nasionál hein atu despaxa mai iha komisaun G asuntu étika nian atu bele haree prosesu ne’e”, dehan Lugu, iha parlamentu nasionál, foin lalais ne’e.

Entretantu, tuir prezidente komisaun G Agostinho Lay, komisaun foin lalais ne’e meza prezidente parlamentu nasionál despaxa ona karta ida mai iha komisaun relasiona ho substituisaun deputadu Jorge Teme nian.

Maibé, komisaun agora daudaun ne’e sei haree kuandu loos ona sei lori fali karta ba iha prezidente parlamentu atu bele halo desizaun.