Membru Komisaun Polítika Permente partidu Frente Mudansa (FM), Luciano Conceição hateten, Estadu presiza valoriza mós saudozu sira ne’ebé mate ona.
“Tau (Xanana) nia naran ne’e Frente Mudansa konsidera ita la valoriza ita nia saudozu sira”, tenik nia, iha Praia Kokeiros, horisehik.
Nia dehan, tinan 15 ona ukun-aan ema sira ne'ebé uluk nu’udar fundadór no lider nasaun nian barak mak Estadu haluha inklui César Mau-laka rasik.
Tuir nia, César Mau-laka nu’udar ministru no komisáriu polítiku iha Suai, iha tinan 1976. Kargu ne’e nia simu bainhira primeiru reuniaun plenária Comite Central FRETILIN (CCF) nian iha Fevereiru 1976, iha Soibada hodi deside setór neen iha tempu okupasaun nian. Tanba ne’e, Suai tama iha fronteira súl.
Tanba ne’e, Frente Mudansa prontu atu muda naran aeroportu internasionál Xanana Gusmão Suai para bele tau fali ba Aeroportu Internasionál César Mau-laka Suai, maibé ida ne’e mós halo bainhira kaer ukun ba tinan lima oin mai.
Antes ne’e, Prezidente Repúblika, Francisco Guterres ‘Lú-Olo’ ofisialmente inaugura ona Aeroportu Internasionál Comandante Em Chefe das FALINTIL Kay Rala Xanana Gusmão, iha Suai-Kovalima, Tersa (20/6).
Konstrusaun aeroportu ho padraun internasionál ne’e gasta orsamentu hamutuk U$D 67.691.189. Obra ne’e rasik konstrui hahú 2014 no finaliza iha Fevereiru 2017.
Liu husi ninia diskursu, Xefe Estadu Francisco ‘Lú-Olo’ hateten, aeroportu ne'ebé inaugura ne’e parte ida ne’ebé sei fó benefísiu ba sidadaun timoroan sira nia mobilidade, tanba fasil atu transporta populasaun sira iha kosta norte ba kosta súl.
“Ha'u fó hanoin uluk kedas katak aeroportu ida ne’e de'it, iha parte ida ne’e sei hasae liután ita nia sidadaun sira nia mobilidade, katak ita nia maluk sira bele ba-mai lalais liután”, dehan Lú-Olo, iha diskursu inaugurasaun Aeroportu Internasionál Comandante Em Chefe das FALINTIL Kay Rala Xanana Gusmão, iha Suai-Kovalima, horisehik.
Tuir nia, aeroportu ne’e bele hasa’e liután kontaktu internasionál, maibé, investimentu iha ne’e boot tebes, importante mós katak setór atividade sira seluk tenke la’o di'ak.
Eis-Prezidente Parlamentu Nasionál hateten, setór turizmu kompleksu, maibé ho konstrusaun aeroportu bele justifika liután atu Suai nakfilak ba fatin turístiku ida.
Lú-Olo dehan, bainhira harii infraestrutura boot sira hanesan ne’e, hatudu katak hakat daudaun ona ba oin. Investe makaas ona iha rai sorin balun. Tanba, esforsu ne'ebé halo daudaun ona atu harii infraestrutura iha rai ida ne’e komesa loke ona dalan ba dezenvolvimentu.
Nia hatutan, Munisípiu Kovalima iha kosta súl sai hanesan fronteira foun iha Timor-Leste. Tanba, rejiaun ne'ebé nakonu ho riku soin naturál oioin no ninia populasaun ladún boot.
Kosta súl ninia populasaun ladún boot. Biar nune’e, área ne’e mak iha rai bokur liu ba setór agrikultura no mina-rai.
