Mari dehan, komemorasaun ne’e atu hanoin hikas tinan 42 liubá hahú ba independénsia Timor-Leste iha Ai-Sirimou. Iha 1975 proklama resurreisaun armada mehi ida husi 1974-75 husi timoroan lubuk ida Francisco Xavier do Amaral, Nicolau Lobato no seluk tan mehi atu halo sakrifísiu hotu-hotu hodi lori independénsia mai Timor.
“Bainhira FRETILIN Manan duni iha 22 Jullu, iha 15 Agostu 2017, ha'u sei mai halo komemorasaun ida ke boot hamutuk ho imi iha ne’e”, dehan Alkatiri, iha kampaña polítika partidu FRETILIN nian, iha munisípiu Aileu, Segunda (3/7).
Nia dehan, bainhira FRETILIN manan duni harii Governu foun atu harii mós Timor-Leste ida buras liu. FRETILIN sei konvida maluk sira tomak, lider partidu polítiku sira hotu atu mai hotu iha fatin ne’e hodi komemora loron boot ida ne’e.
Tuir nia, rai Aileu ne’e hanesan rai husar ne’ebé hotu-hotu hahú governasaun ida di'ak ba rai, kontribui ba malu atu lori dezenvolvimentu ne’ebé di'ak atu povu ida bele moris di'ak iha tinan oin mai.
Tanba ne’e, Alkatiri dehan, tempu to’o ona atu povu sira keta matan delek, saida mak sente ona iha tinan sanulu liubá, buat barak seidauk la’o loloos no seidauk hadi'a.
Nia hateten, referendu 1999 ho restaurasaun independénsia 2002 ne’e bele dehan liberta ona pátria Repúblika Demokrátika Timor Leste (RDTL), tinan sanulu resin ona hotu-hotu dehan hamenus kiak, kombate kiak, maibé povu sei moris kiak nafatin, povu sei moris mukit nafatin.
Ho ne’e, Mari dehan, FRETILIN liberta ona pátria no tempu ona hakarak liberta ona povu ne’ebé terus tinan barak ona, ne’ebé la sente liu saida maka dezenvolvimentu iha rai laran. FRETILIN hakarak mai atu hadi'a povu lori Timor sai buras liután.
