Diretór ES 12 Novembru, Aniceto Pedro da Costa hatete, eskola iha regra ba estudante sira bainhira mai tuir aprendizajen. Estudante labele uza telemovel android, tanba dala barak influensia ba estudante hodi la fokus ba estuda.

“Sira uza android hodi asesu ba ínternet no balu tau filme porno iha telemovel. Tanba ne’e, eskola bandu estudante labele uza telemovel ne'ebé android,” dehan nia, iha ninia servisu fatin, Bekora, horisehik.

Aleinde ne’e, eskola mós bandu estudante sira atu labele fuma no lori kondom ba eskola.

Kona-ba prosesu aprendizajen iha eskola ne’e, profesór esplika katak, iha fatin ne’e hanorin ho lian rua portugés no tetun. Jeralmente livru aprendizajen uza lian portugés. Tanba ne’e, halo ona preparasaun tuir manuál husi ministériu edukasaun.

Diretór ne’e dehan, difikuldade ne'ebé eskola ne’e enfrenta fasilidade eskola, liuliu laboratóriu eskola no komunidade balun ne’ebé kontinua hela iha área eskola nian.

Nia dehan, preokupasaun ne’e eskola halo beibeik ona ba ministériu edukasaun maibé laiha rezultadu to’o agora.

Totál estudante Eskola Sekundária 12 Novembru hamutuk 1.384 no profesór hamutuk 65 ho guarda eskola ida. Profesór sira ho nivel lisensiadu, mestradu no mínimu diploma trés, ne'ebé kona-ba siénsia laiha duvida, maibé lian portugés maka difikulta profesór sira.

Eskola ne’e ho nia sala aprendizajen hamutuk 18, kada sala alunu hamutuk 50 alunu. Eskola dadeer no lokraik, tanba sala eskola limitadu.

Kona-ba kadeira sufisiente ba estudante, maibé kona-ba fasilidade eskola maka janela ho odamatan maka balu aat.