Xefe Estadu Maiór Jenerál F-FDTL, Majór Jenerál Lere Anan Timur, kestiona ró rua ne’ebé oras ne’e la funsiona. Peska ilegál sira kontinua invade tasi área Timor nian tanba laiha ekipamentu atu halo operasaun.

“Ita konsege halo operasaun dala ida iha tasi mane… Ró ne’e rasik la serve hodi halo operasaun iha Tasi Mane,” dehan nia, iha Kuartél Jerál F-FDTL, Fatuhada, horisehik.

Tuir nia, kondisaun ró nian la merese duni atu ba iha parte súl ne’ebé ninia tasi boot.

Tanba ne’e, Jenerál Lere husu ba governu responsabiliza ba kondisaun navál nian ne’ebé oras ne’e enfrenta menus fasilidade, atu Komponente Navál bele kumpre sira nia misaun ho di'ak.

Nia fiar katak, bainhira fasilidade no ekipamentu sufisiente ba Komponente Navál, seguransa ba tasi Timor nian sei hakmatek no laiha atividade peska ilegál atu invade hodi na’ok ikan iha tasi laran.

Investiga Ba Kompañia Fa’an Ikan

Relasiona ho Kompañia husi Xina ne’ebé fa’an ikan Tubaraun tonelada 43, Primeiru Ministru, Rui Maria de Araújo dehan, maski Governu fó ona lisensa ba kompañia peska husi Xina, hodi to’o ikus halo problema tanba fa’an ikan ne’ebé tonelada boot ba rai li’ur.

“Oras ne’e daudaun ita sei halo hela investigasaun ba kazu ne’e,” dehan.

Nia dehan, prosesu investigasaun ne’e rasik sei akumula husi instituisaun governu no instituisaun seguransa ho defeza nian ba kompañia ne’e raik.