Bispu Dioseze Dili, Don Virgílio do Carmo da Silva hateten, atividade marxa ba dame ne’e hanesan meius ida husi parte Igreja Katólika halo hodi konsolida povu sarani tomak atu bele kuda espíritu nasionalizmu no patriotizmu hodi respeitu malu no rona malu hodi komemora loron festa demokrasia, atu bele garantia susesu ba eventu importante ne’e.
Tuir planu, loron marxa ba dame ne’e sei realiza iha loron 2 Marsu 2017, antes tama ba kampaña eleitorál. Atividade ne’e bele fó motivasaun ba sarani hotu atu bele hakribi violénsia hadomi malu hodi tane aas dignidade uma kreda no estadu soberania ne’e.
Don Virgílio dehan, tinan ne’e diferensa tebes ho tinan sira seluk, tanba povu Timor tomak atu hasoru festa demokrasia hodi determina sira nia futuru iha tinan lima oin mai. Ne’e duni, importante mai povu tomak atu bele hakmatek hodi simu no komemora.
Pás no estabilidade iha nasaun ne’e iha ida-idak nia liman. Ne’e duni, festa demokrasia ne’e xave ba pás no armonia iha kapasidade timoroan ida-idak nia atu bele respeita malu.
Tenke aprende rona malu. Militante partidu polítiku sira tenke rona ninia lideransa sira. Tanba ne’e, tenke hanorin militante sira atu bele dixiplina nafatin hatudu maturidade hanesan ema sarani ida hodi komemora eventu importante ne’e.
“Bainhira ita rona malu, halo tuir malu, ha'u hanoin ita nia festa demokrasia ne’e bele la’o diak tuir ema hotu nia hakarak”, tenik nia, iha Episkopál Lesidere, horisehik.
Hanesan ema sidadaun no sarani ida ne'ebé moris iha ambiente ida nia laran tenke rona no respeitu autoridade sira. Bainhira iha konxiénsia hodi rona malu mak ema hotu sei apresia.
