Komandu Polisia Nasionál Timor Leste (PNTL) koordena ona ho Ministériu Agrikultura no Peska (MAP) hodi halo prosesu investigasaun ba kompañia.

Estadu Timor-Leste sériu harii komponente ida ne’ebé envolve husi Unidade Investigasaun Kriminál ho Unidade Polisia Fronteira- PNTL, Komponente Navál-F-FDTL, MAP no SEPFOPE atu halo investigasaun ba kompañia ne’e rasik.

Segundu Komandu PNTL, Komisáriu Faustino da Costa hateten, instituisaun PNTL halo hela prosesu balun relasiona ho kazu ne’e no sei kontinua la’o nafatin.

“Ami sei Hamutuk ho ministériu relevante sei halo prosesu ba kazu ne’e”, dehan Faustino, iha Uma Fukun Parlamentu Nasionál, horisehik.

Komandu mós iha ona planu hodi halo prosesu investigasaun ba kazu ne’e rasik, ne’ebé preokupasaun barak maka mai husi públiku.

Komisáriu Faustino, tempu badak PNTL ho MAP sei halo prosesu investigasaun ba kompañia ne’ebé Governu halo kontratu hodi halo atividade peska iha tasi Timor.

Tanba ne’e, presiza iha liña koordenasaun entre komponente Governu hotu hodi halo investigasaun ba kompañia ne’ebé oras ne’e daudaun hala’o atividade peska iha tasi Timor.

Entretantu, Ministru Agrikultura no Peska (MAP), Estanislau Aleixo da Silva mós husu ona atu halo investigasaun profunda ba kompañia ne'ebé Governu kontrata hodi kaer ikan iha área tasi Timor nian, tanba kaer hotu ikan ne'ebé proibidu atu labele kaer.