Survey ne’ebé SMN halo ho objetivu atu haree problema matan iha Timor-Leste ho tarzetu ba ema ho idade 50 ba leten hodi haree problema matan malahuk ne’ebé maka ás liu iha TL.
“Rejultadu peskiza ida ne’e hatudu katak TL iha prevalénsia, mezmu rezultadu aprezentasaun hatudu katak matan mahalok sei ás iha TL, tanba ho númeru 2,8%, ida ne’e hatudu katak kauza primeiru maka katarak no volume operasaun matan katarak sei menus kuaje 41,5% kompara ho nasaun Sudueste Aziátiku”, dehan diretór Jerál Asuntu Kooperasaun Ministériu Saúde (MS), Narcísio Fernandes iha workshop ka aprezentasaun rezultadu survey moras matan iha Hotel Timor, Kolmera horseik.
Rejultadu ne’e hatudu katak MS sei enfrenta problema rekursu umanu iha área Saúde Matan, iha nível ne’ebé maka sei presija nafatin kapasitasaun no rekursu ba iha programa saúde matan nian.
Relatóriu husi SMN ne’e importante tebes ba Ministériu Saúde atu oinsa hadia fila-fali planu estratéziku matan 2016-2020, tanba husi ne’e professional saúde no entidade hotu ne’ebé maka servisu iha área saúde bele uza dadus husi survey ne’e hanesan baze evidénsia atu hadi’a kualidade prestasaun saúde kompriensivu no adekuadu atu alkansa meta saúde ne’ebé maka defini ona iha planu Governu nian iha futuru.
Atu kontrola moras matan iha TL ne’e la’os responsabilidade MS nia mesak, maibé presija asaun ida ne’ebé bele hetan partisipasaun ativu husi família, komunidade, sosiedade sivíl no setór hotu-hotu ne’ebé maka ho knaar atu tau matan ba povu TL.
Nune’e MS iha esperansa katak totál husi survey nasionál matan nian ne’e bele kontribui dezenvolve mata dalan hodi ko’alia ba implementasaun, monitorizasaun no avaliasaun programa kontrolu no prevensaun ba ema moras matan iha TL.
Rezultadu survey ida ne’e bele sai mós hanesan instrumentu hodi monitoriza progressu no atinjimentu nível internasionál, nível rejionál no nível nasionál.
Tanba ne’e MS agradese ba Lion Club International Foundation (LCIF), International Agency for Prevention of Blindness (IAPB) no Royal Australasian College of Surgeon (RACS) ne’ebé suporta téknikamente no matéria ba survey ida ne’e.
Alen de ne’e MS agradese mós ba enumeradór, supervisór, investigadór no mós diretór servisu saúde munisípiu sira hotu, líder lokál, kolaboradór sira ne’ebé esforsu hodi konklui apoiu ba survey.
