Ministru Longuinhos hatete, objetivu hasoru malu ne’e atu informa preparasaun ba seguransa eleisaun Prezidensial no Parlamentar.

“Informa (ba PR katak) Polisia Nasionál Timor-Leste dezenvolve hela nia planu atividade operasional atu hetan kobertura seguransa iha Munisipiu hotu, iha Postu Administrativu hotu, ba ita-nia sentru votasaun,”dehan Longuinhos ba  Jornalista sira hafoin enkontru ho PR Taur iha Palasiu Prezidente Nicolau Lobato, Aitarak Laran-Dili, Kuarta (25/01).

Governante ne’e garante katak eleisaun sei la’o di’ak, no sei la mosu konfrontasaun ka problema boot.

Longuinhos dehan, seguransa ba eleisaun aleinde polisia mak assume ninia responsabilidade hanesan orgaun tutela ba seguransa, iha mós koordenasaun ho Forsa Armadas, karik iha situasaun balun presiza.

“Ita-nia seguransa ne’e antes de hala’o eleisaun, no atividade kampaña, Polisia sira sei halo operasaun ka seguransa durante fulan neen,” nia informa.