Xanana: “Deskulpa La’ós Ha'u Mak Halo” Featured

By Marsu 20, 2018 3319
Xanana Xanana

DILI: Negosiasaun fronteira marítima to’o ona rohan. Timor-Leste no Austrália konsege define ona baliza tasi permanente. Tanba ne’e, Governu husu relatóriu ba prosesu ne’e, maibé Xefe Negosiadór rejeita tanba la'ós nia kompeténsia hodi aprezenta relatóriu ba Governu.

Ekipa negosiasaun ba fronteira marítima ne’e hetan reprezentasaun husi ministru Adjuntu Primeiru Ministru ba Delimitasaun Fronteira Marítima, Hermenegildo Pereira, ne’ebé nia mak asina akordu ne’e iha loron 6 Marsu 2018 liubá.

Ne’e duni, Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão hateten, portavós Governu, Matias Boavida, la hatene prosesu ne’e, di'ak liu nonook. Labele ko’alia arbiru.

Nia esplika, Primeiru Ministru VII Governu mós sei labele husu ba ema ne’ebé la'ós membru governu, husu maka ministru Adjuntu Primeiru Ministru asuntu ba Delimitasaun Fronteira Marítima nian.

Deskulpa la'ós ha'u Xanana maka atu halo relatóriu ba governu, membru governu ne’e iha ne'ebá duni husu ba nia”, tenik Xanana, iha sede CNRT, foin lalais ne’e.

Nia hatutan, durante fulan neen nia laran ema balun dehan Xanana halo peregrinasaun iha rai li'ur, uza osan Estadu toba de’it iha otél, pasiar husi nasaun ida ba nasaun seluk.

Maibé atu responde de’it katak, luta ba fronteira marítima la'ós atu buka asinatura, maibé luta ida ne’e atu buka manan. Kuandu buka maka asinatura de’it, luta ne’e folin laiha.

Xefe Negosiadór Mak Halo Relatóriu

Hataan ba kestaun ne’e, Primeiru Ministru, Mari Alkatiri hateten, xefe negosiadór mak lakohi aprezenta relatóriu ba Governu signifika durante halo negosiasaun ne’e la'ós reprezenta Estadu.

Iha duni Ministru ida mak tutela ba área ne’e, maibé ministru ne’e la'ós xefe negosiasaun tanba apoia de'it ba xefe negosiadór.

Tanba ne’e, xefe negosiadór mak tenke aprezenta relatóriu. Kuandu lakohi aprezenta ba Governu, entaun ho intensaun atu hamate Estadu.

Alkatiri rekoñese Prezidente Repúblika nu'udar órgaun Estadu, maibé laiha kompeténsia atu halo negosiasaun tanba kompeténsia tomak iha Governu. Ne’e duni, xefe negosiadór tenke aprezenta relatóriu negosiasaun mai Governu. Labele buka razaun oioin hodi lakohi hakbesik ba Governu aprezenta relatóriu.

Nune’e, xefe governu mós sente konfuzaun boot bainhira xefe negosiadór fronteira marítima fila husi estranjeiru seidauk hakat ba Palásiu Governu.

Nia dehan, la buat ida polítika Xanana nian maka nune’e ona, ne’ebé haree de'it bainhira mak hatene dalan ba Palásiu Governu.

Uluk iha tinan 2006 bainhira deklara lakohi sama-ain iha palásiu Governu durante tinan 10, maibé hatene hela dalan. Nune’e bainhira fila mai palásiu tenke halo tuir kedas mak sama-ain.

Ne’e duni, Alkatiri la komprende minia kompadre Xanana Gusmão, bainhira halo polítika respeita ema hotu nia diretu tenke hanesan, tanba iha mundu ne’e laiha ema ida sai Maromak no balun sai diabu. 

Rate this item
(0 votes)

Independente Digital TV