PR Lú-Olo Hakarak Hasoru Lalais Maun Boot Featured

By Cristina Ximenes Marsu 20, 2018 1541
Lu-Olo Lu-Olo

DILI: Xefe Negosiadór Prinsipál Delimitasaun ba Fronteira Marítima, Kay Rala Xanana Gusmão, to’o ona Timor semana ida, maibé seidauk hasoru malu ho Órgaun Estadu sira, aleinde membru partidu koligasaun Aliansa Mudansa ba Progresu (AMP).

Ne’e duni, Prezidente Repúblika, Francisco Guterres ‘Lú-Olo’ iha esperansa atu bele hasoru malu lalais ho Xefe Negosiadór ne’e.

Ha’u hatene katak Maun Boot Xanana Gusmão foin maka mai ne’e sei deskansa lai. Iha tempu ruma maka ita bele hasoru malu, tanba iha ona Timór la susar atu hasoru Xanana”, tenik nia, iha Sentru Konvensaun Dili (SKD), Sábadu (17/03).

Tuir informasaun, Xefe Negosiadór Prinsipál ba Fronteira Marítima (FM) sei hasoru Prezidente Repúblika, iha semana ida ne’e nia laran.

Hataan ba ida ne’e, Xefe Estadu sente di’ak liután bainhira hasoru malu sedu liu ho ninia maluk veteranu ne’e.

Kona-ba dezenvolvimentu ba Greater Sunrise nian, nia dehan, sei hein informasaun ofisiál husi órgaun ezekutivu atu bele hatene loos ba fronteira marítima foin daudauk asina iha Novaiorke oinsá, inklui dezenvolvimentu Greater Sunrise nian.

Prezidente Repúblika (PR) rasik mós hatene kona-ba liña fronteira marítima nian define ona, maibé kona-ba ba dezenvolve Greater Sunrise sei prosesu nian laran hodi kontinua diskute.

Kona-ba pedidu xefe negosiadór nian atu fó kondekorasaun ba advogadu internasionál sira, Lú-Olo’ dehan, bainhira hasoru malu ho maun boot Xanana Gusmão maka ko’alia kona-ba asuntu hirak ne’e. 

Rate this item
(0 votes)

Independente Digital TV