“Lista kandidatura  membru Parlamentu Nasionál ami nian mak ne’e, oinsá atu bele hetan oportunidade hodi ukun rai ida ne’ebé hetan nia bokur husi raan no ruin”,  dehan Xanana Gusmão iha Sede nasionál CNRT Bairro dos Grilhos horisehik.

Xanana konta tuir katak, nasaun ne’e hari tanba foho lulik, rai lulik, uma lulik no Maromak lulik iha leten aas ba nia tulun mak ohin loron nasaun ne’e hetan independénsia.

Nune’e, Prezidente AMP kompromete ba matebian, rai lulik no uma lulik,  karik povu fó fiar ba AMP, sei ukun ho neon no laran, sei haka'as aan hodi povu bele hetan moris di'ak.

Nia sita mós AMP nia moto ne’ebé dehan, hamutuk hari no hametin nasaun.

Xanana fó hanoin mós katak, prosesu konstrusaun estadu iha problema barak, tanba ne’e tenke laran moos, hahalok moos no laran maus hodi nune'e povu  la arrepende ho ita nia ukun.

Lideransa másimu AMP ne'e fiar tomak ba kuadru hahú husi nasionál to’o  baze atu servisu makaas, maibé la'ós atu ba obriga, ameasa no sosa votu povu nian.

Nia mós rekoñese katak, AMP kompostu husi partidu tolu la'ós di'ak liu iha mundu maibé AMP tenke hatudu nia identidade rasik, katak AMP diferente ho komportamentu ida ne'ebé di'ak ba povu.

Nia husu ba kandidatura sira ne’ebé naran iha ona lista atu badinas servisu hodi bele lori vitória ba AMP iha eleisaun antesipada.

Lista kandidatura ne’e hetan ona aprovasaun husi lider másimu partidu tolu atu bele prienxe Parlamentu Nasionál ba períodu 2018 to’o 2022, bainhira hetan fiar husi povu.