Prezidente Konsellu Imprensa (KI), Virgílio da Silva Guterres, fó ezemplu, akontesimentu iha aeroportu, bainhira Xefe Negosiadór Prinsipál Fronteira Marítima, Kay Rala Xanana Gusmão fila mai Timor, publiku la fó valorizasaun ba servisu jornalista sira nian.

“Jornalista sira enfrenta bazeia ba akontesimentu ne’ebé akontese iha aeroportu kona-ba tratamentu ba jornalista sira ne’ebé la ho dignu”, dehan nia, iha Palásiu Prezidensiál, Bairru-Pité, horisehik.

Nia dehan públiku nia tratamentu ne’e la'ós iha aeroportu de’it, maibé iha eventu barak maka akontese. Tanba ne’e, Konsellu Imprensa ko’alia ho Xefe Estadu atu oinsá komunika ho órgaun sira seluk atu tau atensaun ba jornalista sira ho di’ak.

Nia hatutan, iha eventu nasionál sira ne’e atu tau meiu komunikasaun sosiál, liu-liu jornalista sira iha fatin ne’ebé apropriada, nune’e sira bele hetan kobertura ne’ebé di’ak ba eventu ne’e.

Entretantu, Prezidente KI husu ba órgaun ka instituisaun sira ne’ebé responsabiliza ba serimónia protokolu sira, bainhira ema boot ruma mai ka ba iha regra, kuandu dehan jornalista labele tama tenke kumpre.

Maibé regra ne’e jornalista hotu-hotu labele ida tama, ida seluk labele tama, entaun ne’e sira halo ona diskriminasaun.

Tanba ne’e, hein katak labele akontese, bainhira lider sira despedida ka partida ne’e importante, tanba sira ba li'ur lori públiku povu nia naran fila mai sira tenke informa ba povu kona-ba saida maka sira halo iha li'ur.

Entaun, informa liu husi média, jornalista sira ne’e tenke ba ne'ebá atu rona informasaun saida no husu saida mak lider sira ne’e halo iha li'ur durante vizita.

Prezidente Repúblika (PR), Francisco Guterres ‘Lú-Olo’, apoia totalmente hodi fó atensaun jornalista sira ho dignu, liu-liu fó fatin apropriada ba média sira.

“Sira tenke iha pozisaun ne’ebé sira bele hasai imajen, bainhira sira iha hela kotuk de’it oinsá bele hasai imajen. Tanba ne’e, serimónia nasionál ka internasionál ne’e média sira ne’e tenke iha fatin ne’ebé di’ak atu sira bele kapta imajen ne’e ho di’ak”, tenik nia..

Alende ne’e, KI mai hasoru ho Prezidente Repúblika ho objetivu prinsipál maka atu konvida Prezidente Repúblika atu bele tuir serimónia enseramentu forum diálogu Dili ne’ebé sei hala’o iha 20 Maiu 2018.