DILI:  Prezidente Repúblika Taur Matan Ruak husu ba governu atu lori fila arguida Eis Ministra Finansas, Emília Pires fila mai Timor-Leste hodi hasoru justisa.

Taur dehan, Emília tenke fó fiar ba sistema justisa iha Timor-Leste atu bele rezolve ninia problema tuir lei.

“Kona-ba kazu senhora Emília Pires iha prosesu justisa, prezidente repúblika iha konfiansa boot ba órgaun estadu nian sira (tribunál) sei halo servisu tuir mandatu konstituisaun,” dehan Taur ba jornalista, Sesta (10/03).

Taur dehan, sistema justisa maiske iha sei problema barak, maibé sidadaun no ukun na'in sira tenke fó fiar ba servisu autór judisiáriu Timor oan sira.

Entretantu Emília Pires oras ne’e daudauk hela iha Portugál no juis sira kontinua ezije ba governu atu lori nia tenke fila mai TL hodi koopera ho sistema justisa TL.

Desizaun Tribunál Dili foin lalais ne’e, akuza arguida Emília Pires tama komarka tinan 10 no arguida Eis Vice Ministra Saúde, Madalena Hanjam tama komarka tinan 6.

Hadia Risku Ba Justisa TL

Entretantu Taur dehan, problema justisa sai hanesan problema boot ne’ebé estadu tenke haree didi’ak no buka rezolve hodi labele hamosu problema sosiál iha povu nia leet.

Taur dehan, durante ne’e nia alerta makas ba governu, Parlamentu Nasionál, Tribunál Rekursu atu haree risku ba justisa boot ne’ebé estadu la haree didi’ak, sei hamosu problema sosiál.

“Ha’u alerta ba ita nia órgaun soberania hotu ita haree ba risku ba justisa, karik ita la haree didi’ak sei mosu problema boot,” PR preokupa.

Maski nune’e, Taur apresia durante ne’e autór judisiáriu Timoroan barak konsege hakotu kazu lubuk ida iha tribunál.