Liu husi audensia julgamentu, Ministériu Públiku (MP) akuza eis funsionariu públiku na’in rua iha gabinete Prezidente Repúblika, Cizenando Ribeiro ne’ebé assume kargu nudar Koordenadór ba Ekipa Protokolu no Eva Trindade nudar Ofisial Protokolu sai hanesan autór material ho forma konsumadu ba krime pekulatu falsifikasaun agravada ne’ebé previstu iha artigu 295 kodigu penal Timor-Leste.
Tuir artigu ne’e, kuandu funsionariu ne’ebé hasoru lei, halo ninian ka halo ema seluk nia osan ka koiza movel, públiku ka pratikular, sei hetan pena prizaun tinan 3 to’o tinan 10.
Tuir kronolojia ne’ebé MP lee sai katak, kazu ne’e akontese bainhira arguidu na’in rua hato’o proposta Dirasaun Nasionál Asuntu Antigos Kombatentes Libertasaun Nasionál (DNAAKLN) Ministériu Solidaridade Sosial (MSS) ba serimonia aniversariu loron FALINTIL ne’ebé realiza iha 20 Agustu 2013 iha Betano, Munisipiu Manufahi, no selebrasaun ba transladasaun Restu Mortais ba Heróis sira iha Metinaro Dili, iha 7 Dezembru 2013.
MP esplika, ba loron importante 2 ne’e, iha 8 Jullu 2013, arguidu Cizenando hato’o proposta ba DNAAKLN hodi husu orsamentu ho montante $38.710,00 ba atividade iha Betano hodi halo pagamentu ba pulsa, kuantidade 50, kada pulsa $20, ho montante global $1.000 no iha 23 Jullu 2013, DNAAKLN parsila ho montante $23.240,00.
Hafoin hetan aprovasaun, iha 31 Jullu 2013 DNAAKLN, adianta uluk osan ba faze dahuluk ho montante $11.620,00 ba arguida Eva hodi halo preparasaun ba sermónia Dezmobilizasaun ba 20 Agusto.
Hafoin ezekuta, arguida Eva halo relatoriu katak osan sira ne’e uza hodi selu ba kompaña balun ho montante $4.500 no $2.000. Maibé, realidade kompaña ne’ebé nia naran hakerek nunka simu osan ne’e no arguidu sira produs resibu falsu.
“Arguidu sira produz invoice no resivu falsu, (buat) ne’ebé tau iha invoice laran la korresponde ho realidade,” deklara MP iha ninia akuzasaun iha TDD, Sesta (10/03).
Aleinde ne’e, MP dehan, arguidu sira prevee mós osan ho montante $380 hodi selu alimentu (konsumsi) ba ofisial protokolu. Maibé, loloos ofisial protokolu sira simu ona osan viajen lokal husi Palasiu Prezidente Repúblika tuir regra orsamentu ba viajen lokal nian hodi selu alimentu no alojamentu.
“Tanba ne’e, arguidu sira la devia aloka osan ba komsumsi protoluku nian, maibé arguidu sira inventa relatoriu no osan ho montante $380 hela ba arguidu sira,” katak MP.
Ho aktu ne’e, MP akuza arguidu sira halo relatoriu ezekusaun falsu hodi apropria tiha osan ho montante $6.880 ba sira-nia proveitu rasik.
MP kontinua nia akuzasaun katak, iha 27 Agustu 2013, arguida Eva simu tan osan ba faze daruak nian husi DNAAKLN ho montante $4.460.
Hafoin ezekuta, iha relatoriu ezekusaun ne’ebé halo husi arguida Eva no aprova husi arguidu Cizenando katak kompañia Grafika Patria produz booklet programa jeral no booklet diskursu PR, ne’ebé selu osan ho montante $8.000.
Maibé, tuir MP, realidade la loos, tanba iha invoice ne’e arguidu sira tau Ronny Suhendra nia naran no asinatura ho data 24 Jullu 2013, afinal Ronny nunka asina invoice tanba iha tinan 2013, Ronny la serbisu ona iha Kompañia Grafika Patria no asinatura ne’e laos ninian.
“Arguidu sira halo falsifikasaun (ba) Ronny Suhendra nia asinatura hodi produz invoice falsu, la konresponde ho realidade, ho objektivu atu kauza prejuizu ba estadu ho osan montante $8.000 no uza ba sira-nia proveitu rasik,” deklara MP.
Tuir MP, orsamentu ba produz Booklet programa jeral no booklet diskursu PR ho montante $4.290 la’os $8.000.
Hafoin MP lee akuzasaun ne’e, Tribunál deside adia julgamentu ba 24 Marsu 2017 tuku 11:00 dader hodi rona deklasaun husi arguidu sira.
Audensia julgamentu ne’e prezide husi Juiz Koletivu, Ministériu Públiku reprezenta husi prokuradór Jacinto Babo, no arguidu sira hetan asistensia legal husi Defensór Públiku Cancio Xavier.
