Bolu de’it Ata (la’os naran loos) tenke simu konsekuensia todan husi nia laen, bolu de’it Nio (la’os naran loos). Nio baku nia feen, Ata no ameasa atu oho no so’e ba tasi-laran tanba konsidera Ata ko’alia barak.

Tuir akuzasaun husi Ministériu Públiku (MP) ne’ebé Tribunál lee sai katak, iha tinan 2013 arguidu lori tudik ida ameasa lezada, maske la konsege sona, maibé iha momentu ne’e arguidu tuku lezada nia ulun ne’ebé rezulta bubu.

Maske hetan baku, maibé lezada la ba hato’o keixa ruma no problema ne’e rezolve tuir dalan familiar.

Iha tinan 2014, arguidu tuku tan lezada nia ulun dala-barak ne’ebé mak lezada la sura. Arguidu buti lezada nia kakorok, soe ba kama leten no kontinua basa lezada nia matan, no tuku lezada nia inus to’o ran.

Iha loron ne’e kedas lezada halai ba Fokupers no hela iha ne’eba durante loron ida. Hahú husi ne’e arguidu la baku ona lezada.

Maibé, iha 1 Dezembru 2016 tuku 9:00 kalan iha merkadu Taibesi, arguidu baku fali lezada no ameansa atu oho no tu ba soe tama tasi, tanba ne’e lezada tauk no la hela iha uma.

Ba faktus sira ne’e, MP akuza arguidu sai hanesan material ba Krime Violensia Domestika ho forma maustrato ne’ebé previstu iha artigu 154 ne’ebé hatete: ba ema ne’ebé mak pratika maustratus fiziku ka psikiko ba nia konzuje ka ba ema ne’ebé moris ho feen-laen sei hetan pena prizaun tinan 2 to’o tinan 6, kuandu dispozisaun legal seluk la prevee pena todan.

Hatan ba akuzaun ne’e, arguidu deklaba ba Tribunál katak, faktus ne’e loos hotu. Nia baku lezada tanba lezada ko’alia barak.

“Ida ne’e ha’u nervozu hodi baku,” dehan arguidu iha audensia julgamentu iha Tribunal Distrital Dili, Kinta (30/03).

Iha fatin hanesan, lezada informa katak, iha momentu ne’e arguidu baku tanba lezada ko’alia barak nune’e halo arguidu nervozu.

“Iha altura baku ne’e ha’u husu osan ba nia $400 atu ba sosa toga hodi hatais ba graduasaun,” hatete lezada.

Audensia julgamentu ne’e prezide husi Juiz Koletivu, Ministériu Públiku reprezenta husi Prokuradóra Ivonia Guterres, no arguidu hetan asistensia legal husi Defensór Públiku Manuel Sarmento.