Haree ba ida ne’e, Sio kontinua hala’i ba to’o iha nia uma iha Bairro-pite, hafoin hatuun nia oan, Sio halai fila hodi ba Mie nia uma ho intensaun atu husu tanba saida mak Mie tafui kabeen.

Tuir akuzasaun husi Ministériu Públiku (MP) katak kazu ne’e akontese iha 4 Agustus 2016, tuku 5:30 lokraik.

“Bainhira arguidu ho nia oan fila husi Bairro-Pite, ba kedas lezada nia uma Komoro hodi husu ba lezada, tanba sa ohin tafui kaben mai ha’u,” deklara MP liu husi ninia akuzasaun iha Tribunal Distrital Dili, Kuarta (29/03).

Arguidu tama ba uma-laran hodi buti lezada nia kakorok, dudu rabat ba parede, maibé tanba arguidu nia oan na’in tolu iha dapur rona barulhu iha kuartu-laran, sira ba dudu sees tiha arguidu husi lezada. Arguidu mós hasai liafuan aat ba lezada.

Hatan ba akuzasaun ne’e, arguidu deklara katak akuzasaun la loos hotu.

Nia dehan, nia ba lezada nia uma atu husu de’it ba lezada tanba saida mak tafui kabeen ba nia.

Arguidu mós deklara katak nia la buti lezada nia kakorok, no nia ho nonok fila fali ba nia uma iha Bairo-Pite.

Arguidu dehan ba Tribunal katak, nia ho lezada nudar fen ho laen maibé fahe malu ona iha tinan 2014.

Iha fatin hanesan, lezada informa ba tribunal katak, nia tafui kaben tanba sente laran sa’e, laos tanba arguidu ho nia oan feto liu husi nia oin.

Lezada dehan, arguidu buti duni nia kakorok maibé la kleur.

Iha oportunidade ne’e, lezada mós husu ba tribunal atu bandu arguidu labele ba iha lezada nia uma, tanba sei kria emosaun no sentimentu entre arguidu ho lezada, maske nune’e lezada la bandu atu nia oan sira ba vizita nia aman.

Rona tiha deklarasaun husi parte rua, Tribunal husu ba MP atu kontinua ba alegasaun, iha alegasun MP husu ba tribunal atu fó advertensia ba arguidu nia hahalok.

Entretantu, kona-ba krime Ofensas Integridade Fiziku Simples ne’ebé arguidu komete, Defensór Públiku husu atu absolbe arguidu no ba krime ameasa husu arguidu atu selu multa.

Tribunal adia julgamentu ba loron 12 Abril 2017 tuku 11:00 hodi rona desizaun final.

Audensia julgamentu ne’e prezide husi Juiz Singular, Eujebio Savier, Ministériu Públiku reprezenta husi Prokuradór Nelson Carvalho, no arguidu hetan asistensia legal husi Defensór Públiku Sebastião Amadio.