Governu identifika ona, komunidade uma kain 200 resin maka okupa rai estadu besik Aeroportu Komoro nian too área Tasi Tolu sei muda sai hotu. Tanba komunidade hirak ne’e halo negósiu besik liu estrada ibun.
Atu implementa polítika ne’e, hahú kinta (07/03) horisehik, Ministru Obras Públika (MOP), Salvador Eugénio Soares dos Reis Pires hala’o ona enkontru entre Diresaun Jerál Obras Públika (DGOP) ho Komandu Polísia Nasionál Timor-Leste (PNTL) munisípiu Dili, no autoridade lokál munisípiu Dili nian hodi tuur kria komisaun ida ba implementasaun projetu haluan estrada Rotunda Komoro too Tasi Tolu.
MOP liuhosi DGOP hamutuk ho PNTL no autoridade lokál sei harii komisaun ida hodi organiza oinsá mak komunidade hamamuk estrada ibun, atu nune'e bele haluan tan estrada husi Rotunda, Komoro too Tasi-Tolu.
Iha enkontru ne'e entidade hotu konkorda iha tempu badak sei harii komisaun ida, servisu hotu komisaun ne'e mak sei hala'o.
Antes ne'e, bazeia ba dadus ne'ebé DGOP iha família hamutuk uma-kain 200 resin mak hela iha área ne’e maibé to'o oras ne'e seidauk bele hatene loloos dadus atuál, tanba ne'e, sei identifika fila-fali komunidade ne'ebé mak hela iha área ne’e.
Tuir planu, iha fulan-Jullu 2021 estrada liga husi Portu Baia Tibar mai to'o Rotunda, Komoro finaliza ona hodi fasilita movimentasaun transporte públiku no privadu inklui transporte pezadu ne'ebé sei halo movimentasaun Portu Tibar-Dili.
