Tuir Ministru Prezidensia Konsellu Ministru, Fidelis Leite Magalhaens hatete, Konsellu Ministru aprova ona projetu rezulusaun governu nian hodi suspende impozisaun konfinamentu domisiliáriu jerál ba populasaun iha munisípiu Dili, to’o Governu deside fila-fali.
"Haree ba impaktu ne’ebé provoka husi inundasaun iha loron 4 fulan-abril liubá no hodi permite populasaun bele enfrenta estragu sira ne’ebé provoka husi bee-sa’e (banjir), ne’ebé estraga ka destroi uma barak, Konsellu Ministru aprova projetu Rezolusaun Governu nian ne’ebé suspende impozisaun konfinamentu domisiliáriu jerál ba populasaun iha munisípiu Dili, to’o Governu deside fila-fali,"dehan nia iha konferensia imprensa iha Palasiu Governu, (08/04).
Nia hatutan, governu foti desizaun hodi suspende konfinamentu obrigatoriu iha Dili tanba haree ba impaktu husi inundasaun ne’ebé estragus populasaun barak nia hela fatin, uma no sasan seluk no komunidade barak mak sofre husu dezastre naturais ne’e. Aleinde ne’e mos ba loja sira ne’ebé faan roupa no segundu mao mos bele loke fali hodi sira nia atividade negosiu.
Ba movimentu transporte publiku sira hanesan taxi no mikrolete sira bele halo fali atividade hirak ne’e, atu nunee hodi fasilita populasun sira iha Dili durante periode ne’e.
Governante ne’e mos hatutan, maske suspende konfinamentu domisiliariu maibé serka sanitaria nafatin mantein.
Nune’e, sei kontinua bandu sirkulasaun ema nian entre munisípiu sira ne’e no munisípiu sira-seluk, exetu iha kazu sira ne’ebé ho fundamentu forte tanba razaun sira hanesan seguransa públika, saúde públika, asisténsia umanitária, manutensaun husi sistema sira ba abastesimentu públiku ka ba realizasaun interese públiku nian. Governu deside la halo renovasaun ba impozisaun konfinamentu domisiliáriu jerál ba populasaun iha Baukau no Vikeke. Molok nee, Konsellu Ministru prolonga serka sanitaria ba dala-3 iha munisipiu Baucau no Vikeke hahu iha oras 23:59 loron 2 fulan abril too oras 00:00 loron 9 fulan abril tinan 2021.
Entretantu serka sanitária iha Dili sei too iha loron 14 fulan-Maiu. Enkuantu Estadu emerjensia sei remata iha loron 2 Abril tinan 2021.
Jornalista: Saturnina da Costa
Editor: Jose Sarito Amaral
