Lansamentu ba programa refere ofisialmente husi Vise Ministru Edukasaun Juventude no Desportu (MEJD), Antonio Guterres, tersa (8/2), iha Eskola Sekundaria Tecnika Vokasional Industria no Teknologia (ESTVlT) 28 Novembru Bekora.
Iha ambítu lansamentu, Vise Ministru ne’e hateten, planu kontrusaun no reabilitasaun eskola sira prevee ona iha Osamentu Jeral Estadu (OJE) 2021 nian hamutuk dollar amerikanu millaun $11.
Reabilitasaun no konstrusaun ne’e sei hahú fulan-Fevereiru ne’e to’o remata.
"Iha OJE 2021 iha millaun $11 no purvolta oursentu 60 ita aloka deit ba iha infrastrutura, maibé projetu ba infrastrutura ho karakter ha'at hanesan, projetu komunitaria no kapital dezenvolvimentu no fundo infrastrutura no ida mak servisu bens ba eskola",dehan nia liu husi diskursu ba lansamentu programa refere, iha ESTVIT 28 Novembru Bekora, Tersa (8/2).
Nia hatutan, projetu komunitaria kompostu ba OJE 2021 nian, atu halo konstrusaun no reabilitasaun ba eskola iha munisipiu 12, inklui RAEOA hamutuk 212 no sala aula hamutuk 656.
Konstrusaun no reabilitasaun iha munisipiu Dili hamutuk 16, no obra sira ne'e kaer husi Grupu Komunitariu ne'ebé hamahan aan iha MEJD ho programa hanaran Programa Konstrusaun no Reabilitasaun Infrastrutura Edukativa (PKRIE).
Iha Fatin hanesan Presidente Grupu Komunitaria Konstrusaun Eskolar, Filomeno da Silva afirma, iha tinan ne'e MEJD kria projetu konstrusaun ne'e sei involve eskola ho komunidade sira ne'ebé besik iha eskola.
"Ami prontu kolabora ho MEJD atu bele kaer obra ne'e ho esperansa katak, obra ne'e bele la'o ho di'ak, maibé ami hein tekniku sira husi edukasaun nian, no iha grupu komunitariu bele apoiu projetu ne'e la'o ho di'ak",nia relata.
Enkuantu iha lansamentu ba programa ne'e, parte MEJD sei halo mos reabilitasaun infrastrutura sira iha eskola 28 Novembru Bekora, hanesan hadia moru no reabilita eskola balun no kondisaun aat no seluk tan.
Entretantu Diretór ESTVlT 28 Novembru Bekora, Pedro da Silva Ximenes hato'o agradese ba governu, tanba konsidera eskola refere hodi halo mos reabilitasaun, tanba moru eskola nian, kompaña abandona iha tinan hirak liu ba.
"Iha momentu ne'eba kompaña ida halo obra la hotu, entaun ami ejije nafatin obra sira la hotu ne'e halo nusa, tanba ne'e preozudika tebes ba ami nia prosesu aprendizazem sira, ida moru laiha ne'e ema tama mai bele estraga fasilidade sira iha ne'e", nia akresenta.
Nia parte mos agradeze tanba eskola refere bele mos tama iha projetu komunitaria ne'e.
Konstrusaun no reabilitasaun Infrastrutura iha eskola refere, ne'ebe sei Konstrui husi parte grupo komunitariu husi MEJD ho osamentu dollar amerikanu hamutuk $143.567.56 ho nia durasaun durante fulan 6 iha tinan ne'e.
Asistente editor: Saturnina da Costa
