Tuir Diretór Eskola ESTV 28 Novembru Bekora, Pedro da Silva Ximenes hatete,  agora dadaun menus professor ba produtivu sira, tanba iha tekniku vokasional iha unidade kurrikular tolu hanesan sosio-kultural, sientifiku no produtivu.

 “Ita nia unidade kurrikular tolu nee  iha produtivu nian mak professor la sufisiente tanbá Ida nee mak espesifiku bá ita nia departamentu sira ne’ebé mak estabelese iha ne’e hanesan eletrisidade, informatika no ortografika, entaun ita nia professor produtivu sira iha la sufisiente hodi atende ita nia estudante sira hodi halo pratika,”dehan nia ba Online INDEPENDENTE, iha  ESTV 28 Novembru Bekora, tersa (8/02).

Iha eskola refere, departamentu informatika nian iha professor ida deit, tanba ne'e bele akomoda esudante sira husi primeiru ano to'o iha tersiru ano iha prosesu aprendizajen.

Tanba ne'e,  iha difikuldade tebes servisu Kona-ba ba Professor sira ne'ebe mak atu servisu hodi fornese buat ida ne'ebe mak di'ak ba estudante sira nia nia aprende.

Aliende ne'e, Ministru Edukasaun Juventude no Desportu (MEJD), Armindo Maia hatete, durante ne’e MEJD rekolla ona dadus,  iha professor barak mak iha munisipiu to’o agora sei kontratadu hela.

 “Ami sei rekolla fali dadus sira ne'e iha munisipiu hotu depois mak ita sei haree fali ba Dili nian, atu nunee ita bele responde bá sira nia preokupasaun tanbá ita hatene katak professor barak mak servisu durante tinan naruk ho vida kontratadu,”dehan nia.

Nia informa, durante ne'e parte MEJD konsege rekolla ona dadus professor iha Munisipiu sira hamtuk rihun 4.

Tanba ne'e, agora  dadaun dadus kontinua tama nafatin ba iha MEJD nune'e  sira sei hein rekolla hotu mak foin rezolve preokupasaun professor sira nian.

Iha Eskola Ensinu Sekundária Tekniku Vokasional total estudante tinan  2022 hamutuk na'in 400 no total professor 45, kompostu husi kontratu husi governu 16 no no funsionariu públiku 29.

Asistente editor: Saturnina da Costa