Tuir komunikadu ne'ebé Online Independente www.independentetl asesu, tersa (8/2) haktuir katak Xefe Governu kansela nia viajen ba Australia, hafoin hetan rejultadu teste swab konfirma katak positivu Covid-19, inklui nia espoza.
"Primeiru Ministru Taur Matan Ruak, tersa ohin husu atu hato’o pedidu adia vizita ofisiál ba Austrália ne’ebé planeia ona ba Kuarta semana ne’e, ho razaun motivu saúde, tanba rezultadu teste swab iha loron 7 no loron 8 fulan-fevereiru tinan 2022, ne’ebé fó sai iha tersa loraik ne’e, konfirma Xefe Governu ho nia espoza Isabel da Costa Ferreira, pozitivu SARS-COV-2," dehan komunikadu ne'e.
Maske pozitivu Covid-19, maibé Xefe Ezekutivu ho nia Espoza afirma katak sira na’in rua ho kondisaun saúde di’ak hela, no tuir rekomendasaun médiku, Xefe Governu presiza deskansa iha uma tuir protokolu Ministériu Saúde hodi hein teste tuir mai.
Entretantu, Kona-ba pedidu adia vizita ne’e, Primeiru Ministru Taur Matan Ruak komunika kedas ona ho Ministra Negósius Estranjeirus no Kooperasaun, Adaljiza Albertina Xavier Reis Magno atu halo korespondensia formalmente ba iha parte Governu Austráliano nian, no sei ajenda fali ba tempu oportunu.
