“Maromak hakarak rekonsilia ho o, ne’ebé nakonu ho domin ho ita ida-idak. Na’i Maromak oferese tempu espesial ida ne’e mai ita atu ita bele pauza uitoan, atu kontempla hanoin kona-ba Maromak nia lia-fuan hirak ne’e,” dehan Amu Bispu iha ninia omilia bainhira prezide Misa Kuarta-feira Sinzas iha Igreja Katerdal Dili, Kuarta (06/03).   

Tuir Amu Bispu, kuaresma nu’udar tempu ida ne’ebé konsidera renovasaun vida, liu husi harohan, liu husi kombate funu hasoru an no halo jezun.

Tanba ne’e, Bispu hatutan, kuaresma mak dalan ne’ebé hasai ema husi kondisaun atan ba sala, sai ema ne’ebé livre husi ministério ba sala hodi ba ksolok ba Na’i Maromak, husi buat ne’ebé mate ba moris hias.

“Lo’os duni maluk sira, ita ema (husi) rai rahun, rai rahun ne’ebé iha Maromak nia futar liman santu, Nia ne’ebé fó espiritu mai ita ida-idak. Na’i Maromak hakarak tebes atu espiritu moris nian ne’e sai na’in ba moris, la’os espitiru ne’ebé hakiak no haburas buat ne’ebé hanoin de’it ita-nia an rasik, ambisaun, interesse pessoal, espiritu hirak ne’e mak taka ita ema ninia fuan,” dehan Amu Virgilio.

Tanba ne’e, Amu Bispu dehan, tempu kuaresma nu’udar tempu atu hadi’ak fali buat ne’ebé ema sobu, hahalok aat sira, no hakarak buat ne’ebé estraga nunka atu hadia.

“Tanba ne’e, tempu ida ne’e, tempu korajen. Tempu ida iha korajen atu dehan lae ba mate espiritual. Mate espiritual mak bainhira reza, ba misa, rona Maromak nia lia-fuan, maibé laiha forsa vida espiritual, husi laran mate hela, laiha buat ida ne’ebé dudu ita. Tanba ne’e presiza forsa ida ne’e, ida ne’e sai hanesan obstákulu ida.”

Amu Bispu afirma katak, kuaresma konvida ema atu dehan la’e ba lia-fuan sira ne’ebé sai husi ema-nia ibun ba buat ne’ebé laiha sentidu.

“Lia-fuan xoke ninian, lia-fuan tarata-malu ninia, lia-fuan insulta malu nian. Presiza iha korajen atu dehan ba an hodi laiha bobar-lia, maibé atu hatene buat ne’e loos no hadomi lia loos,” katak Bispu Dioseze Dili ne’e.

Entretantu, Prezidente Repúblika (PR) Francisco Guterres Lú Olo ho nia família partisipa misa Kuarta-feira Sinzas iha Igreja Katedral Dili.

Hafoin partisipa misa, PR Lu Olo hatete, hanesan sarani Katolika hakarak atu halo reflesaun klean iha tempu kuaresma ida ne’e hodi bele dame ho Kristu.

“Tempu kuaresma, tempu ba ita hotu par halo reflexaun. Hanesan sarani ha’u mai ho há’u-nia família, ne’e sarani sira hotu par ita hotu iha misa ida ne’e halo reflexaun iha loron 40 nia laran hodi deskobre ita-nia an hanesan ema sarani, hanesan ema umanu ita ema sala na’in, i tenta halo reflexaun kle’an hodi bele dame ho Kristu iha tempu ohin,” dehan PR Lú Olo.