Ministru Justisa Manuela Carceres informa, iha tempu badak nia laran nia parte sei Koordena ho instituisaun estadu sira seluk hodi halo operasaun maka’as ba karreta estadu ne’ebé halo atividade sees husi tempu sebisu no laiha lisensa.

Maske la koalia klaru sansaun saida mak sei fó, maibé Ministru ne’e hatete katak governu sei fó pena maka’as ba FP ne’ebé uza karreta estadu ba interese privadu.

"Ami sei fó pena maka’as ba sira ne'ebé gosta utiliza karreta estadu nian iha fora de servisu ba serbisu privadu," deklara Ministru Justisa, Manuel Carceres.

Relasiona ho asuntu refere, iha Sesta foin lalais, governu realiza enkontru interministerial ne’ebé kompostu husi Ministériu Finansas, Ministériu Justisa, Ministériu Administrasaun Estatal (MAE) hodi reforma patrmoniu estadu, liu-liu viaturas estadu.

Tuir dadus, Ministru Manuel informa, viaturas estadu nian hamutuk 4.197 ne’ebé fahe ba klasifikasaun karreta lizeriu no viaturas pezadus, inklui patrimoniu estadu nian.

"Viaturas sira ne'ebé agora dadaun ita utuliza ba serbisu hamutuk rihun 3.693 ne'ebé kondisaun di'ak hala'o serbisu estadu nian," dehan Manuel Carceres.

Molok ne'e, ekipa tekniku halo ona levantamentu dadus ba patrimoniu estadu maibé atividade refere paradu. Maibé, ho rezolusaun governu númeru 17/2019 ne'ebé Konsellu Ministru aprova iha 16 Fevereiru reativa fali kontrolu ba patrimoniu estadu.

Entretantu, Primeiru Ministru Taur Matan Ruak apela ba ekipa interministerial, liu-liu Ministériu Finansas, atu forma ekipa hodi halo levantamentu ba dadus viaturas estadu nian.

PM mós bandu ajente estadu no administrasaun públiku sira atu labele utiliza patrimoniu estadu sees husi oras serbisu nian.