Komandante Daruak PNTL Dili, Superintendente Asistente Euclides Belo hatete, polisia kontinua hala’o serbisu bazeia ba lei númeru 1/2013 ne’ebé fó kompetensia ba PNTL atu kontrola movimentu karreta estadu.

“Ami nafatin kontrola monvimentu transporte estadu ne’ebé liu oras serbisu nian bainhira funsionariu sira hakarak uza hodi halo atividades for a serbisu nian,” dehan nia.

Molok ne’e, PNTL Munisipiu Dili prende karreta estadu no kaptura ema sivil ida ne’ebé uza patrimoniu estadu tula aimaran.

Tuir informasaun, Funsionariu públiku ida ho naran Hermenegildo dos Santos entrega karreta estadu ba nia oan-mane, Nicson Pedro dos Santos, hodi ba tula ai-maran iha Munisipiu Likisa iha Kinta (28/02) foin lalais.

Karreta ho modelu pick up ne’ebé identifika nu’udar patrimoniu estadu no koloka iha Ministériu Agrikultura no Peska ho númeru xapa matrikula 02.945 G.TL ne’e tula ai-maran tama kapital Dili iha tuku 20.00 OTL.

Polisia Nasionál Timor Leste (PNTL) Munisipiu Dili, iha Kinta kalan, konsege identifika no kaptura suspeitu, inklui karreta ne’ebé suspeitu lori.

Tuir informasaun husi Komandante Daruak PNTL Dili, Superintendente Asistente Euclides Belo, polisia ne’ebé halo patrullamentu rutina konsege halo kapturasaun iha área Tasi-Tolu bainhira karreta refere tula ai-maran husi diresaun Likisá mai iha Dili liu oras serbisu.

Liu husi atividade check point iha área Tasi- Tolu, nia dehan, PNTL identifika karreta estadu refere la tau xapa matrikula.

“Xapa matrikula ne’ebé sira produs ho surat-tahan suspeitu hasai tiha,” informa Euclides ba jornalista sira iha nia knar fatin, Kaikoli, Sesta (01/03).

Nia hatete, suspeitu ne’ebé kondus karreta husi MAP nu’udar ema sivil no laiha karta kondusaun.

“Utiliza karreta governu nian tula fali ai-maran… Ita konsidera komete ona krime pekulatu (tanba) ultiliza sasan estadun nian ba interese privadu,” afirma Euclides.

Liu husi prosesu identifikasaun, Euclides hatutan, polisia konsege identifika katak karreta refere baibain utuliza husi funsionariu MAP ho naran Hermenegildo dos Santos. Maibé, iha momentu ne’ebá, funsionariu refere entrega karreta ba nia oan-mane, Nicson Pedro dos Santos, hodi lori ba tula ai-maran.

“PNTL kaptura ne’e ho flagante de litu, Nicson mak lori duni, tanba ne’e konsidera kontra duni lei tranzitu no kontra kodigu penal,” deklara Euclides.

Hafoin deteta no halo kapturasaun, polisia ne’ebé halo patrulamentu entrega ba seksaun Tranzitu, hafoin detein suspeitu durante oras 72 hodi prosesa ba tribunal. Ba karreta, sei para hela iha Komando Munisipiu Dili.

PNTL halo patrulamentu ba karreta estadu ne’ebé halo movimentu sees husi oras serbisu bazeia ba dekretu lei númeru 1/2013.

“(dekretu lei ne’e autoriza PNTL) atu halo operasaun ba karreta estadu nian ne’ebé sirkula la tuir regras,” deklara Euclides.